Munaadabad balaaran oo caawo lagu qabtay magaalada Zurich ayaa lagu bixiyay abaal marrino kala duwan oo qalai ah.
Ciyaaryahan Cristiano Ronaldo oo weerarka uga ciyaara xulka Portugal iyo kooxda Real Madrid ayaa sanadkii labaad oo xiriir ah ku guuleystay abaal marinta ciyaaryahankii sanadkii la soo dhaafay ee 2014-ka ugu wanaasanaa aduunka ee FIFA Ballon d’Or.
Ciyaaryahan Ronaldo oo 29-jir ah ayaa waxaa abaal marintan kula tartamayay ciyaaryahan Lionel Messi oo weerarka uga ciyaarta xulka Argentina iyo kooxda Barcelona iyo Manuel Neuer oo ah gool-hayaha xulka Germany iyo kooxda Bayern Munich.
Ciyaaryahan Ronaldo ayaa sanadkii la soo dhaafay afar koob oo kala ah Copa del Rey, Champions League, UEFA Super Cup iyo Fifa Club World Cup kula guuleystay kooxda Real Madrid,waxana uu dhaliyay 56-gool 51-kulan oo uu ciyaaray.
Ciyaaryahan Lionel Messi oo 27-jir ah ayaa sanadkii la soo dhaafay kooxdiisa Barcelona u dhaliyay 50-gool 52-kulan oo uu u ciyaaray.
Gool-haye Manuel Neuer oo 28-jir ah ayaa sanadkii la soo dhaafay xulka Germany kula guuleystay koobkii aduunka,isagoo sidoo kale kooxda Bayern Munich la qaaday horyaalka Jarmalka ee Bundesliga.
Waxaa sidoo kale lagu dhawaaqay kooxda ugu wanaagsan aduunka,waxana ka mid ahaa ciyaartoyda kala ah.
Manuel Neuer (Bayern Munich/Germany), Philipp Lahm (Bayern Munich/Germany), Thiago Silva (Paris Saint-Germain/Brazil), David Luiz (Chelsea/Paris Saint-Germain/Brazil), Sergio Ramos (Real Madrid/Spain), Angel Di Maria (Real Madrid/Manchester United/Argentina), Toni Kroos (Bayern Munich/Real Madrid/Germany), Andres Iniesta (Barcelona/Spain), Cristiano Ronaldo (Real Madrid/Portugal), Lionel Messi (Barcelona/Argentina), Arjen Robben (Bayern Munich/Netherlands).
Ciyaaryahan James Rodriguez oo weerarka uga ciyaara xulka Colombia iyo kooxda Real Madrid ayaa ku guuleystay abaal marinta Puskas Award oo ah goolkii ugu wanaagsanaa sanadkii la soo dhaafay,waxana uu ahaa gool uu koobkii aduunka ka dhaliyay xulka Uruguay.
Ciyaaryahan James Rodriguez ayaa waxaa abaal marinta kula tartamayay ciyaaryahanada kala ah Stephanie Roche oo ah gabar u dhalatay dalka Ireland iyo Robin van Persie oo u dhashay dalka Holland.
Tababaraha xulka qaranka Germany Joachim Low oo sanadkii la soo dhaafay koobkii aduunka u qaaday xulkiisa ayaa ku guuleystay abaal marinta tababarihii caalamka ugu wanaagsanaa sanadkii la soo dhaafay.
Tababare Low ayaa waxaa abaal marintan kula tartamayay tababaraha kooxda Real Madrid Carlo Ancelotti iyo tababaraha kooxda Atletico Madrid Diego Simeone.
Ciyaaryahanad Nadine Kessler ayaa ku guuleystay abaal-marinta ciyaaryahanadii caalamka ugu wanaagsaneed sanadkii dhaafay.
Nadine Kessler ayaa waxaa abaal marintan kula tartamayay Marta oo u dhalatay dalka Brazil iyo Abby Wambach oo u dhalatay dalka Mareykanka.
Tababare Ralf Kellermann oo tababare u ah kooxda haweenka ee VfL Wolfsburg ayaa ku guuleystay tababarihii ugu wanaagsanaa dhanka naadiyada haweenka.
Tababare Ralf Kellermann ayaa waxaa abaal marintan kula tartamayay Maren Meinert oo tababare u ah xulka Germany oo da’doodu ay ka yartahay 19-jirada iyo tababraha xulka haweenka Japan ee Norio Sasaki.
