Kooxda Barcelona ayaa u soo baxday Semi-finalka koobka Copa Del Rey,ka dib markii lugtii labaad ay 3-2 uga badiyay kooxda Atletico Madrid oo lagu ciyaarayay garoonkeeda Vicente Calderon.
Kooxda Barcelona ayaa lugtii koowaad garoonkeeda Camp Nou 1-0 uga soo badisay kooxda Atletico Madrid.
Kooxda Atletico Madrid ayaa goolka la hor martay,waxaan daqiiqadii koowaad ee ciyaarta u dhaliyay ciyaaryahan Fernando Torres.
Ciyaaryahan Neymar ayaa daqiiqadii sagaalaad ee ciyaarta gool barbardhac ah u dhaliyay kooxda Barcelona.
Kooxda Atletico Madrid ayaa rajo soo yeelatay ka dib markii daqiiqadii 30-aad ee ciyaarta uu rigoore muran dhalisay uu u dhaliyay ciyaaryahan Raul Garcia.
Waxaa sii xumaatay rajadii kooxda Atletico Madrid,ka dib markii ciyaaryahan Miranda uu daqiiqadii 38-aad ee ciyaarta si qalad ah isaga dhaliyay gool,taasi oo ciyaarta ka dhigtay 2-2.
Ciyaaryahan Neymar ayaa dhamaadkii qeybtii hore ee ciyaarta gool sedaxaad oo niyad ka jabiyay kooxda Atletico Madrid u dhaliyay kooxda Barcelona,sidasi ayaana lagu kala nastay qeybtii hore ee ciyaarta.
Dhamaadkii qeybtii hore ee ciyaarta ayaa waxaa kooxda Atletico Madrid kaarka casaanka ah ka qaatay ciyaaryahan Gabi,taasi oo sii niyad jabisay kooxda Atletico Madrid.
Ciyaaryahan Mario Suarez ayaa dhamaadkii ciyaarta kaarka casaanka ah ka qaatay kooxda Atletico Madrid.
Kooxda Barcelona ayaa isku celcelis ahaan 4-2 ugu soo baxay Semi-finalka koobka Copa Del Rey.
