Muqdisho, 8 Maarso, 2015 Ururka Qaranka Suxufiyiinta Soomaaliyeed ayaa hambalyo u diray dhamaan haweenka Soomaaliyeed, munaasabadda xuska 8-Maarso, gaar ahaan haweenka Suxufiyiinta Soomaaliyeed iyo kaalinta mugga ah ee ay ka jiraan warbaahinta Soomaaliyeed.
NUSOJ ayaa munaasabaddan awgeed baaq u dirtay dhamaan warbaahinta Soomaaliyeed oo ah inay door hogaamineed siiyaan gabdhaha suxufiyiinta ee shaqeeya,iyo fursadaha shaqo ee heer hogaamineedna haddii ay ka bixi karaan lagu tixgeliyo. Inkastoo hadda ay jiraan warbaahino fara ku tiris ah oo ay haween suxufiyiin ah hoggaamiyaan, haddana waa tiro aad u yar marka loo eego tirade warbaahineed ee dalka jirta.
“Gabdhaha Suxufiyiinta Soomaaliyeed door lixaad leh ayay ka soo qaateen koboca iyo tayeynta warbaahinta, waana mudan yihiin ay door hogaamineed ku yeeshaan warbaahinta.” Ayay tiri Xabiiba Axmed Jimcaale, oo ah guddoomiye ku xigeenka Ururka Suxufiyiinta Qaranka Soomaaliyeed ee NUSOJ, ahna tifaftiraha wargeyska Mogadishu Times “Waxaa jira gabdho suxufiyiin ah mudan in door hogaamineed laga siiyo saxaafadda.”
Guddoomiye Xabiiba ayaa ugu dambeyntii tiri, “Waxaan rajeynayaa in sanadka soo socda uu noqon doono sanad isbedel wanaagsan sameeya, oo aan arko in warbaahin walba hogaankeeda sare ay ku jirto gabar saxafiyad ah, iyadoo Ururka NUSOJ kordhin doono ka qeybqaadashada gabdhaha ee hoggaanka warbaahinta.
Ururka suxufiyiinta Qaranka Soomaaliyeed ayaa wada qorshooyin lagu tababarayo gabdhaha Suxufiyiinta ah, taasoo looga gol leeyahay in gabdhaha lagu siiyo tababaro aqoontooda kor loogu qaadayo, isla markaana qeyb ka ah barnaamijyada NUSOJ ugu talo gashay in lagu dhiiriigeliy haweenka Suxufiyiinta ah.
