Bandhig Hidaha iyo Dhaqanka ah oo lagu soo afjarayey rabshadihii dhawaan lagu soo barakiciyey dadka Ajaanibta ah ee ku nool deegaanka Soweto ee dalka Koonfur Afrika ayaa xalay lagu qabtay halkaasi, waxaana ka qeybgalay ajaanib ah iyo qaar ka mid ah shacabka dalkaasi.
Deegaanka oo dhaca dhanka koonfureed ee magaalada Johannesburg ayaa munaasabadda lagu qabtay ay soo qaban qaabiyeen Guddiga Jaaliyadda Soomaaliyeed ee dalka Koonfur Afrika iyo maamulka deegaanka Soweto, waxaana u jeedka yahay in dib loo soo celiyo isdhexgalka bulshada, isla markaana ay mid ka noqdaan dadka dhibaateynaya ajaanibta halkaasi howlaha ganacsi u jooga.
Guddoomiyaha Jaaliyadda Soomaaliyeed ee dalka Koonfur Afrika Mudane Caamir Sheekh oo la hadlay Warbaahinta Qaranka ayaa sheegay in kulanka laga baran doono waxyaabo badan oo ku saabsan sidii ay u wada noolaan lahaayeen qowmiyadaha kala duwan ee dalka Koonfur Afrika ku nool.
โ19-kii Janaayo ayay ahayd markii Soomaali ganacsato ah lagu soo weeraray dukaaman ay halkaan ku leeyihiin oo uu ku dhitay wiil 14 sano jir ah, oo soo jiitay indhaha caalamka, taasi oo ay sabab u ahayd rabshadaha halkaan ka dhacay, runtii waxaan ku dadaalnay in ganacsato badan oo Soomaaliyeed aan dib ugu soo celino goobahooda ganacsiโ ayuu yiri Mudane Caamir.
Qaar ka mid ah Jaaliyadda Soomaaliyeed oo ka qeyb galay Bandhigga Hidaha iyo Dhaqanka ah ee lagu soo afjarayey rabshadihii dhawaan lagu soo barakiciyey dadka Ajaanibta ayaa sheegay inay aad ugu faraxsanyihiin ka qeyb galka bandhigga, ayna diyaar u yihiin inay wax la qeybsadaan jinsiyadaha kala duwan ee magaalada Soweto ku nool.
Dhalinyarro Soomaaliyeed ayaa goobta ku soo bandhigay suugaan ka hadlaysa midnimada iyo wax wada qeybsiga, waana markii ugu horeysa oo deegaanka Soweto lagu qabto bandhig nuucaani oo kale ah.
