Tartan kubadda cagta ah oo lagu maamuusayay xuska 72-guuradii ka soo wareegtay aas aaska ururka Dhallinyarada Soomaaliyeed ee SYL 15-May sanadkii 1943-dii oo uu ka qeybgalay Madaxweynaha Jamhuuriyadda Federaalka ah ee Soomaaliya Mudane Xasan Sheekh Maxamuud, xubno ka tirsan labada gole ee dowladda, maamulka Gobolka Banaadir iyo bahda Isboortiga ayaa shalay ka dhacday garoonka Benaadir Stadium ee degmada C/casiis, halkaasi oo ay ku kulmeen kooxaha Elman iyo LLPP Jeenyo.
Tartanka oo uu daah rufay Madaxweyne Xasan Sheekh Maxamuud ayaa dadkii u soo daawasho tegay cayaarta waxa ay aad ugu riyaaqeen qaab ciyaareedka ay labada koox soo bandhigeen, iyadoo cayaarta waqtigii loogu talagalay ay ku soo idlaatay bar bar dhac 0-0, waxaana gool ku laad loo dhigay labada koox ay guusha ku raacday kooxda LLPP Jeenyo oo ku adkaatay 4-2.
Wasiirka Wasaaradda Dhallinyarada iyo Cayaaraha ee Xukuumadda Soomaliya Mudane Maxamed Cabdullaahi Xasan Nuux oo goobta ka hadlay ayaa sheegay 15 bisha May ay tahay maalin mudan in ay Ummadda Soomaaliyeed u dabaal degaan, isla markaana dhallinyarada Soomaaliyed looga baahan yahay in la yimaadan isbadal muuqda oo ay kaga qeyb qaadan karaan horumarka dalka.
“Waxaan aad ugu faraxsa nahay maanta in Madaxweynahu yimaado Garoonka, asagoo cayaarti xuska ama dabaal daga 15 May ka qeyb galayo, maalintaasi oo ah maalin aad u weyn aiyaartasi kusoo dhaweyneyno kuna weyneyno maalintaas, marka waxaan leenahay dhamaan hambalyao cayaarta uu Madaxwaeyanaha kasoo qeyba galay sida ay u dhacday iyo sida ay labada kooxod u cayaaren aad baan ugu faraxsanahay dhamaan dadkii kasoo qeyb galay hambalyo” ayuu yiri Wasiirka dhalinyarda iyo Isboortiga.
Madaxweynaha Jamhuuriyadda Federaalka ah ee Soomaaliya Mudane Xasan Sheekh Maxamuud ayaa ugu dambeyntii kooxda LLPP Jeenyo guddoonsiiyay koobka lagu xusayay 15-ka May, iyadoo xiriirka kubadda cagta ay Madaxweynaha guddoonsiiyeen bilad sharaf.
Xigasho Sawirada:-Goolfm.net
