Kulankaan oo lagu soo dhaweynayey heshiis hor dhac ah oo ay wada galeen dhawan beelo walaalo ah oo ku dagaalamay deegaano hoos yimaadda degmada Warshiiq ee gobolka Shabeelaha dhexe ayaa Shalay lagu qabtay Muqdisho, waxaana ka qayb galay xildhibaano ka tirsan Baarlamaanka Soomaaliya , Guddoomiyaha gobolka Sh. Dhexe, iyo odayaal dhaqameedyo ka soo kala jeeda beelaha diriirto dhexmartay.
Dagaalkaan oo dhexmaray 3-ka mid ah beelaha wada degga gobolka shabelaha dhexe ayaa ka dhashay is qab qabsi la xiira la haanshiyaha dhul daaqsimeed waxaana maamulka gobolka Shabeelaha dhexe u xiray dad kor u dhaafaya 8 ruux kuwaa oo ay ku jiraan ganacsato lagu eedaynayo in kaalin ay ka qaadanayeen hurinta dagaalkaasi.
Qaaar ka mid ah odayaasha dhaqanka ee kulankaasi ka hadla y ayaa si isku mid ah u cadeeyey in ay diyaar u yihiin in ay nabad qaataan islamarkaana ay meel iska dhigaan dhibatooyinkii dhacay.
Guddoomiyaha gobolka Shabeelaha dhexe Cali Cabdullaahi xuseen Guud-laawe oo kulanka ka hadlay ayaa sheegay in aad ay kaga xun yihiin dagaalka dhexmaray beelaha walaalaha ah islamarkaana ay Soo dhaweynayaan heshiiska ay qaateen waxgaradka 3-da beelood.
Xildhibaanadii ka qayb galay kulankaa lagu soo dhaweynayey heshiis hor dhac ah oo ay wada galeen beelahaasi ayaa ugu baaqay waxgaradka beelaha in ay ku dadaalaan horumarinta dib u heshiisiinta.
