Kaddib markii ay soo ifbaxeen wararka sheegaya in mudanayaal ka tirsan baarlamanka ay mowshin ka keeneen madaxweynaha Jamhuuriyadda Federaalka Soomaaliya ayaa arrintaasi waxaa walaac ka muujiyay qeybaha bulshada rayidka ah oo tallaabo dib u dhac ah ku tilmaamay mowshinkaasi.
Qaar ka mid ah qeybaha bulshada rayidka ah ee ku sugan Muqdisho oo la hadlay Radio Muqdisho ayaa muujiyay sida ay uga xunyihiin mowshinka la sheegay in laga keenay madaxweynaha Jamhuuriyadda, waxeyna meesha ka saareen in xilligaan an loo baahneyn khilaaf cusub oo ragaadiya habsami u socodka howlaha dowladda.
Sheekh Nuur Baaruud Gurxan oo ka mid ah culumaa’uddiinka ugu caansan dalkeenna islamarkaana ah afhayeenka hey’adda culimada Soomaaliyeed ayaa mudanayaasha baarlamanka ka dalbaday iney joojiyaan mowshin keeni kara khilaaf iyo dib u dhac, isagoo xusay in muddadii dowladda ay ka harsantahay muddo kooban.
Guddoomiyaha ururka haweenka gobolka Banaadir Jawaahir Baarqab ayaa mowshinkaasi ku tilmantay mid aan ku habbooneyn xilligan, waxeyna ka digtay khilaaf xilligan hareeya hey’adaha dowladda.
