Wasiirka Warfaafinta, dhaqanka iyo dalxiiska ee Xukuumadda Federaalka Soomaaliya oo ay waheliyaan safiirka dowladda Cumaan u qaabilsan geeska afrika iyo Jaziiradaha komoroos iyo mas’uuliyiin kale ayaa maanta booqday dugsiga hoose iyo dhexe ee loogu magac daray qoraagii Soomaaliyeed Allaha u naxriistee Dr Xuseen Sheeklh Axmed Kadarre oo hada ah xarun lagu dhaqan geliyo carruurta derba jiifka ah ee magaaladda Muqdisho oo taasoo ay aas-aastay marwada Madaxweynaha Sahro Cumar Xasan.
Mas’uuliyiintan ayaa kormeeray fasalada carruurtan ay wax ku bartaan iyo qeybaha kale ee lagu xanaaneeyo.
Xaliimo Cabdulle Cali oo ah maamule ku-xigeenka xarunta ayaa mas’uuyliyiintii xarunta booqday waxa ay uga warbixisay xaaladaha ay carruurtan ku suganyihiin, iyadoo ugu baaqday dadka Soomaaliyeed gaar ahaan qurba joogta in carruurtan ay taageeraan.
“Caruurtan markii la keenayay xaaladaooda wey liidatay, hadana aad ayay u wanaagsan yihiin oo waxa ay u egyihiin in waalidiintooda ay la joogaan,waxaan ugu baaqeynaa dadka Soomaaliyeed, gaar ahaan qurba joogta in caruurtan la taageero”ayay tiri Xaliimo.
Safiirka dowladda Cumaan u qaabilsan geeska afrika iyo Jaziiradaha Komoroos Abdalla Bin Mubarak Al Araimi ayaa sheegay in uu aad ugu farxay markuu arkay carruurta xaruntan lagu xanaaneeyo, sida ay u noolyihiin iyo waxbarashooda, isagoo tilmaamay in dowladda Cumaan ay sii wadi doonto taageerada ay siineyso shacabka Soomaaliyeed iyo dowladooda.
Wasiirka Warfaafinta, Dhaqanka iyo Dalxiiska Soomaaliya Mudane Maxamed Cabdi Xayir Maareeye ayaa uga mahadceliyay safiirka Cumaan kormeerka uu ku tagay xarunta carruurta derbi jiifka ah lagu xanaaneeyo, isagoo mahad gaar ah u jeediyay Marwada Madaxweynaha dalka oo xaruntasi dib u howlgelisay.
“Dowladda waxa ay hadda u jeesatay daryeelka carruurta Soomaaliyeed iyo sidoo kale maxaabaaiista oo hadda fursado sahqo abuuris ah iyo tababaro la siinayo, marka dowladda Cumaan aad ayay Soomaaliya u taageertaa” ayuu yiri Wasiir Maareeye.
Xaruntan oo lagu xanaaneeyo ku dhawaad 100 carruur oo ka mid ahaa kuwa derbi jiifka ah ee magaalada Muqdisho ayaa waxaa gacanta ku heysa ka warqabkooda Marwada Madxweynaha dalka Marwo Sahro Cumar Xasan, waxaana carruurta xaruntan ay ka helaan daryeel nololeed iyo mid waxbarasho.
