Munaasabaddan lagu soo gabo gabeynayay todobaadka dhaqanka ee Jaamacadda SIU oo ka qeyb galeen Maamulka sare ee Jaamacadda, Macalimiin, Abwaanno uu ka midyahay Abwaan Singub, arday iyo marti sharaf kale oo munaasabadda lagu casuumay ayaa maanta lagu qabtay xarunta saddexaad ee Jaamacadda ee magaalada Muqdisho.
Todobaadka dhaqanka ee sanadkan ayaa waxaa ku tartamayay arday ka kala socotay saddex kuliyadood oo kala ah kuliyadda Cilmiga iyo bulshada, kuliyadda Caafimaadka iyo kuliyadda ganacsiga iyo dhaqaalaha, waxaana ay ardaydu goobta ku soo bandhigeen bandhig faneed ka turjumayay dhaqanka Soomaaliya, iyadoo ay guddiga garsoorka ay ahaayeen Abwaan Maxamuud Cabdullaahi Ciise Singub, Cabdikariin Shire Xuseen Sandheere, Mahad Xasan Fareey iyo Cabdullaahi Sheekh Cabdi Aadan
Abwaan Maxamuud Cabdullaahi Ciise Singub ayaa ku dhawaaqay natiijada sida ay u kala guuleysteen saddexda kuliyadood ee todobaadka dhaqanka soo bandhigay, isagoo amaan u jeediyay sida ay uga qeyb qaateen todobaadka dhaqanka ardaydii bandhig dhaqameedka soo gudbisay oo uu xusay in kaalinta koowaad ay galeen ardayda Kuliyadda caafimaadka, halka kuliyadaha cilmiga bulshada iyo dhaqaalaha ay kaalinta labaad wada galeen.
Mid ka mid ah ardayda Kuliyadda Caafimaadka oo ku hadlayay magaca kuwa ku guuleystay tartanka ayaa sheegay in jeedka ugu weyn ay tahay in ardayda dhigata kuliyadaha kala duwan ee Jaamacadda ay isku bartaan, isla markaana ay ka qeyb qaataan xoojinta dhaqanka Soomaaliyeed.
Guddoomiye ku-xigeenka Jaamacadda SIU Maxamed Yuusuf Sheekh oo gabo gabadii goobta hadal ka jeediyaya ayaa hoosta ka xariiqay in Jaamacadda SIU ay todobaadka dhaqanka qabaneyso sanadkii saddexaad, isla markaana u jeedka Jaamacaddu uu yahay in ardayda lagu baraarujiyo xoojinta dhaqankeena suuban, ayna ka qaataan door fir fircoon.
Gabo gabadii munaasabadda waxaa shahaaddo sharaf la guddoonsiiyay Guddiga abwaanada ee munaasabadda goob jooga ka ahaa iyo qaar ka mid ah arday ka kala socotay saddexda kuliyadeed ee ka qeyb qaadatay todobaadka dhaqanka ee Jaamacadda SIU.
