Heshiis iskaashi dhanka waxbarashada oo ay kala saxixadeen Iftiin Education and development (IFED) iyo jaamacadda SIMAD ayaa ka dhacay xarunta maamulka ee jaamacadda SIMAD.
Heshiiska ayaa dhigaya in ay jaamacadda SIMAD bixiso tababar macallinimo oo socanaya muddo 5 sano ah kaa oo lagu tababarayo 80 macalim oo ka tirsan macalimiinta Iftiin. Sido kale jaamacadda ayaa ka furaysa xarun waxbaraho degmada Cadaado halkaas oo uu tababarku ka dhacayo.
Iftiin waa hayad madax bannaan oo ay aasaaseen aqoonyahanno qurbe joog ah, kana howl gasha gobollada dhexe. Waxa ay gacanta ku haysa in ka badan 10 dugsi oo waxbarashada aasaasiga ah iyo tan sareba lagu bixiyo, kuwaas oo ku yaalla Mudug iyo Galguduud.
Gudomiyaha jaamacadda SIMAD Daahir Xasan Cabdi ayaa sheegay in ay aad ugu faraxsan yihiin in loo dhaweeyo jaamacadda bulshada Soomaaliyeed, asagoo intaa ku daray in ay xarumo waxbarasho dhawaan jaamcaddu ka furi doonto gobollo kale.
Gudomiyaha hayadda iftiin Cabdixafiid Salaad Siyaad oo asna hadlay ayaa sheegay in ay fursad wayn u tahay dadka gobolada dhexe in waxbarasho tayo leh loogu geeyo hoygoodi. Waxa uu tilmaamay in heshiiskan uu taabanayo takhasusaadka xisaabta, physics-ka, biology iyo chemistriga. Waxa uu intaa ku daray in ay rajaynayaan sanadaha soo socda in kulliyaad kale lagu kordhin doono.
Waa markii ugu hireeysay ee ay jaamacadda SIMAD xarun waxbarasho ka furto meel ka baxsan gobolka Banaadir.
