Guddoomiyihii Jaaliyadda Soomaaliyeed ee Wadanka Sweden ayaa is casilay kaddib markii loo magacaabay in uu noqdo Isu duwaha xafiiska ka hortaga rabshadaha ee magaalada Stockholm.
Mudane Cabdinuur Ciise oo ahaa Guddoomiyaha Jaaliyada Soomaaliyeed ee Dalka Sweden ayaa xalay si rasmi ah u wareejiyey hogaanka Jaaliyada Soomaaliyeed ee dalkaasi, taasi oo ka dambeysay markii Dowlada Sweden ay u magacowday in uu noqdo Isu duwaha xafiiska ka hortaga rabshadaha.
Xaflad casho sharaf ah oo si wada jir ah ay uga soo qeybgaleen qeybaha kala duwan ee bulshada Soomaaliyeed ee magaalada Stockholm ayaa si rasmi ah xilkii guddoomiyaha Jaaliyada loogu wareejiyey Mudane Cabdicasiis Cali Geedi oo ahaa gudoomiyihii Ururka waalidiinta iyo macalimiinta ee magaalada Stockholm, waxaana uu Mudane Geedi xilkan sii heyn doonaa illaa iyo sanadka dambe.
Xilka loo magacaabay Cabdinuur Ciise ayaa ah kii ugu sareeyey oo qof Soomaaliyeed loo magacaabo.
