Wasaradda Amniga Gudaha Mareykanka qeybtooda qaabilsan Duulimaadka iyo Wakaaladda Nabadgalyada Gaadiidka oo u xil saaan in ay dadka ka saarto Diiwaanka Dadka aanan loo ogoleyn in ay diyaaradaha ku dhoofaan sababo la xariira magacyo isku eg oo la isku qalday ayaa la kulantay jaaliyada Soomaalida Minneapolis ee gobolka Minnesota.
Kulankani ayaa qeyb ka ahaa kulamo horey u dhacay oo jaaliyada lala yeeshay balse kulankii maanta ayaa ka duwanaa kuwii hore maadama Wakaalada nabad galyada Gaadiidka ay horey usoo qaateen qalabkooda Computer-ada kuwaasi oo fursad u siiyey dadkii maanta joogay in ay magacyadooda baaraan isla markaana laga saaro dadka Duulimaadyada loo diiday.
Arintani ayaa soo bilaabatay shan Sanno ka hor markii ay badatay cabashada iyo qeyla dhaanta Jaaliyadda Soomaalida ay ka muujinayeen in magacyadooda lagu daray Liiska dadka aanan dhoofi karin.
Kimberly Walton oo ka tirsan wakaaladda amniga gudaha. oo la hadlaysay Saxaafada ayaa sheegtay in wada shaqeyn dhab ah oo la yeesho ay horseedi karto in la sugo amniga Dalka.
“Waxaan go’aansanay in aan halkan soo gaarsiino barnaamijka dib u eegista diiwaanka dadka duulimaadka ka caaggan, taasi oo ay dadkani xaq u leeyihiin, waxaan qabanaynaa araajidooda, islamarkaasina dhagaysanaynaa cabashooyinkooda” ayay tiri.
Dad badan oo Soomaali ah ayaa buuxiyey Araajida kuwaasi oo laga saaray dad magacyadooda lagu qalday waxaana la siiyey tixraac ay kaga badbaadi karaan dhibaatada mar marka qaar lagala kulmo Garoonka Diyaaradaha.
Waa Talaabo aad u wanaagsan oo jaaliyada Soomaalida ay si weyn ugu riyaaqday waxayna ku tusinaysaa in wada shaqeyn wanaagsan ay dhex taalo jaaliyada Soomaalida iyo Dowlada Maraynkanka si loogu wada shaqeeyo Amaanka Dalka oo lagu wada nool yahay.
