Maamulka degmada Shibis ayaa manta olole nadaafadeed oo dib loogu soo celinaayo bilicda degmada ka bilaabay xaafadaha kala duwan ee degmadaasi, iyadoo guddomiyaha Shibis uu soo kormeeray goobaha ay ka socotay nadaafadda.
Maamulka degmada oo kaashanaya shacabka ayaa waxyaaha kala duwan waxa ay ka wadeen olole nadaafadeed oo loogu talagalay in sare loogu qaado bilicda, taas oo logu soo dhaweynayo maalmaha ciida.
Haween iyo dhallinyaro ayaa la arkayay iyaga oo ku howlan sidii ay qashinka uga nadiifin lahaayeen hareeraha waddooyinka iyo xaafadaha degmadaasi, taasi oo qeyb ka ah tartan ay maamulada degmooyinka ugu jiraan bilic soo celinta caasimadda, maadama maamulka gobolka uu horey u balan qaaday in abaal marin la guddoonsiin doono degmadii ku guuleysata tartanka ku aadan bilicda caasimadda.
Gudoomiyha degmada Shibis Axmed Muumin Maxamed ayaa shacabka degmada Shibis ugu baaqay in ay ka qayb qaatan olalaha nadaafadeed ay ka wadaan xaafadaha kala duwan ee degmada, isagoo ka digay in qashinka lagu daadiyo hareeraha waddooyinka.
