Madaxweynaha dowlad goboleedka Galmudug Mudane Cabdikariin Xuseen Guuleed ayaa magacaabay Guddoomiyaha cusub gobolka Mudug iyo ku-xigeenadiisa, iyadoo caawa xaflad arrintaasi ku saabsan lagu qabtay magaalada Gaalkacyo.
Xafladaan oo si wayn loo soo agaasimay ayaa waxaa kasoo qeyb-galay Wasiirada Waxbarashada Galmudug ee kala ah, Caafimaadka, Wasiiru-dowlaha arrimaha gudaha, Wasiir ku-xigeenka Cayaaraha iyo Dhalinyarada, Wasiir ku-xigeenka Cadaalada, Xildhibaanno, madaxdii hore ee Galmudug soo maray, siyaasiyiin, Qurba-joog, Haween, Culimaa’udiin iyo qeybaha kala duwan ee bulshada gobalka Mudug.
Munaasabada ayaa lagu shaacinayay Wareegto kasoo baxday Xafiiska Madaxweynaha dowlad goboleedka Galmudug oo Guddoomiyaha gobalka Mudug loogu magacaabay Mudane Cabdirashiid Xaashi Cartan.
Munaasabada waxaa ka hadlay qaar kamid ah Wasiirada Galmudug ee madasha goobjooga ka ahaa waxa ayna aad usoo dhaweeyeen Guddoomiyaha cusub ee loo magacaabay gobalka Mudug, waxayna kula dardaarmeen inuu howshiisa si Wadaniyad ah ka muuqato u guto.
Guddoomiyaha cusub ee gobalka Mudug Mudane Cabdirashiid Xaashi Cartan oo madasha isna ka hadlay ayaa ka mahadceliyay xilka loo magacaabay, waxuuna ugu baaqay bulshada reer Mudug inay kala shaqeeyaan sidii loo horumarin lahaa gobalkaan.
Madaxweynaha dowlada Galmudug Mudane Cabdikariim Xuseen Guuleed oo gaba-gabadii xaflada ka hadlay ayaa sheegay inuu karti iyo aqoon usoo xushay Mudane Cabdirashiid Xaashi Cartan inuu noqdo Guddoomiyaha gobalka Mudug, waxuuna kula dardaarmay inuu Bulshada gobalka Mudug ugu shaqeeyo si howl-karnimo iyo daacadnimo ay ku dheehan tahay.
Mudane Cabdikariin ayaa Guddoomiyihii hore ee gobalka Mudug Mudane Aways Cali Siciid ku ammaanay iuu wax badan ka qabtay arrimo ay ka mid tahay ammaanka magaalada Gaalkacyo, waxuuna Guddoomiyaha cusub uu tilmamay in ay hor taalo shaqo adag oo loo baahan yahay in uu wax badan ka qabto.
MADAXWEYNAHA GALMUDUG AYAA SIDOO KALE MAGACAABAY.
Mudane Cabdi Xuseen Sheikh Ahmed Gudoomiye Kuxigeenka Arrimaha Siyaasada iyo Amniga ee gobolka
Axmed Maxamed Shire Guddoomiye Ku-xigeenka Maamulka iy Maaliyadda ee gobolka
Maxamed Ali Adan Guddoomiye Ku-xigeenka Arimaha Bulshada ee gobolka
