Munaasabad ballaaran oo shahaaddooyin lagu guddoonsiinayay arday baratay cilmiga dawada, kuwaasoo ka qalin jebiyay jaamacadda Jamhuuriya ayaa maanta lagu qabtay magaalada Muqdisho.
Xaflad ay ku qalin jabinayeen ku dhawaad 70 arday oo dhameysatay wax barashada heerka dibloomada ee taqasuska cilmiga barashada daawada oo ay bixiso jaamacadda jamhuuriya ayaa waxaa ka qeyb galay maamulka jaamacadda, macalimiin, waalidiin, arday, iyo marti sharaf
Inta ay munaasabadda socotay ayaa looga hadlay faa’iidooyinka uu ummadda Soomaaliyeed u leeyahay barashada cilmiga daawada iyo baahida loo qabo in la helo dhalinyaro baratay cilmigaas.
Macalimiintii iyo marti sharaftii ka hadashay munaasabadda ayaa ardayda ku boorrisay in ay waxbarashada sii wadaan islamarkaana ay bulshada uga faa’ideeyaan cilmiga ay barteen.
Qaar ka mid ah ardaydii ka qalin jabisay jaamacadda oo la hadlay Radio Muqdisho ayaa muujiyay sida ay ugu faraxsanyihiin barashada maaddada cilmiga dawada oo ay ka qalin jibiyeen, iyagoo ku amaanay maamulka iyo macalimiinta jaamacadda Jamhuuriya dhiiri gelintooda wanaagsan oo ay la garab taagnaayeen muddadii ay wax barashada ku jireen.
Madaxa jaamacadaha ee wasaaradda waxbarashada iyo tacliinta sare mudane Bashiir Maxamuud Jimcaale oo dhankiisa munaasabadda ka hadlay ayaa arday ugu hambalyeeyay dadaalka ay muujiyeen, isagoo ku boorriyay iney si kordhiyaan waxbarashada si ay ummaddooda ugu faa’iideeyaan.
Gudoomiyaha jaamcadda jamhuuriya Prof Maxamuud Axmed Jimcaale oo munaasabadda soo xiray aya ardayda kula dardaarmay in ay saameyn ku yeeshaan xaaladaha caafimaad ee wadanka ka jira iyagoo maanka ku haya baahida ay ummadda Soomaaliyeed u qabto helidda aqoonyahanno wax u soo bartay dalkooda iyo dadkooda.
Gabagabadii munaasabadda ayaa ardayda waxaa la doonsiiyay shahaaddooyin iyo abaalmarinno ka tujumaya cilmiga ay soo barteen.
Sawir qaade: Maxamed Ibraahim Raage “Honest”
