Munaasabad lagu daah furayay tartan kubadda cagta oo ay wada ciyaari doonaan 17-koox oo ka kala socda dugsiyada waxbarasho ee Hoose islamarkaana dowladda gacanta ay ku heyso kuwaa oo ku yaala gobolka Banaadir ayaa maanta lagu qabtay magaalada Muqdisho, iyadoo munaasabadaaasi ay ka qeyb galeen wasiiro ka tirsan Xukuumadda Federaalka Soomaaliya,Maamulayaasha iskuulada ardaydani laga soo xulay,ardayda ka qeyb qaadneysa tartanka, iyo marti sharaf kale.
Agaasimaha waaxda Dugsiyada dowladda ee Wasaaradda waxbarashada dalka ayaa ugu horeyn ka hadlay ahmiyada tartankan, isagoo sheegay in uu yahay mid isdhex gal bulsho ardaydana mooraalka loogu dhisayo.
Wasiiru Dowlaha waxbarashada Cabdulaahi Bile Nuur oo wasaaradiisu soo qaban qaabisay barnaamijkani ayaa sheegay in kooxda ka soo baxda kooxahani wada ciyaaraya ay la ciyaari doonaan kooxo matalaya wadamada jaamacadda carabta ciyaar ka dhici doonta Wadanka Qadar.
Wasiirka Howlaha guud iyo dib u dhiska Dalka Eng. Salah Sheikh Osman oo ka mid ahaa Wasiiradii ka qeyb galay xafladda ayaa shegay in uu ka qeyb qadanayo dib u dhiska garoomada lagu ciyaaro ciyaaraha kale duwan.
Wasiirka dhalinyarada iyo ciyaaraha Maxamed Cabdulaahi Xasan Nuux oo hadal dheer ka jeediyay halkaasi ayaa la dardaarmay caruurta laga soo kala xulay iskuulada magaalada Muqdisho, isagoo ku booriyay in hami ay u yeeshaan waxbarashada oo ah mida ay ku gaari karaan horumar Mustaqbal .
Tartan kubadda cagta ah oo ay wada cayaari doonaan 17-kooxood oo matalaya dugsiyada waxbarasho ee dowladda gacanta ku heyso ayaa 8-da kooxeed ee u soo gudubta wareega 2-aad ayaa waxaa xusid mudan in Tv-ga Caalamiga ah ee Al Jaziira uu si toos ah u tabin doono ciyaaraha ay wada ciyaarayaan kooxahaasi, iyadoo kooxda ku soo baxda tartanka ay la ciyaari doonto kooxa ka socda wadamada Jaamacada Carabta iyagoo Soomaaliya u mataleya ciyaar ka dhaceysa Wadanka Qadar.
