Booliska dalka Beljamka ayaa baadi goobaya nin la rumeysan yahay in uu ka dambeeyay qaraxyadii Talaadadii ka dhacay magaalada Brussels ee xarunta dalka Beljamka.
Ninkaasi ayaa sawirkiisa waxaa laga arkay kaamirooyinka ammaanka ee ku rakibnaa garoonka caalamiga ah ee magaaladaasi ay qaraxyada ka dheceen.
Saraakiisha dalkaasi Beljamka ayaa sheegaya in labo nin oo kale oo ninkaasi ku wehliyay weerarkii garoonka ay is qarxiyeen,
Qaraxyadii ka dhacay garoonka diyaaradaha iyo goob tareennada laga raaco waxaa ku geeriyooday 34 qof halka 250 qof oo kalena ay ku dhaawacmeen.
Booliska ayaa ugu baaqay dadkii qaraxyadaasi ku duubay moobeeladooda iyo kaameerooyinka in ay ka caawiyaan baaritaanka.
Ciidamo dheeraad ah ayaa la geeyay gudaha magaalada, waxaana booliska ay gacanta ku soo dhigeen kiimiko, waxyaabaha qarxa iyo calanka kooxda khilaafada islaamka kaddib markii ay hawlgal ka fuliyeen xaafad ka mid ah magaaladaasi Brussels.
Weeraradani ayaa waxaa sheegtay kooxda Khilaafada Islaamka, waxa ayna ku soo beegmayaan afar maalmood kaddib markii Brussels lagu qabtay Saalax Cabdisalaam oo baarayaasha dalkaasi ay sheegayaan in uu ku lug lahaa weerarkii sanadkii hore ka dhacay magaalada Paris ee dalka Faransiiska.
