Allaha u naxariistee Dr Aadan Xaaji Ibraahin oo horey Wasiirka caafimaadka uga soo noqday dowladihii KMG ah ayaa ku geeriyooday dalka India, halkaasi oo caafimaad loogu qaaday..
Wasiir ku-xigeenka Howlaha Guud iyo dib u dhiska ee Xukuumadda Soomaaliya Maxamed Cumar Geeddi oo la hadlayay laanta Afka Soomaaliga ee VOA ayaa uga tacsiyadeeyay guud ahaan shacabka Soomaaliyeed gaar ahaan ehelka uu ka tegay in uu samir iyo iimaan ka siiyo.
Wasiir ku-xigeenka ayaa tilmaamay in Allaha u naxariistee Dr Aadan ay is yaqaaneen muddo, isla markaana ay ka wada tirsanaayeen baarlamaanka Soomaaliya, waxaana uu intaa ku daray in ahaa shaqsi u adeega bulshada, xilli kastana aan ka daalin u adeegidda bulshadiisa, isagoo xusay in uu ku geeriyooday dalka India oo adeeg caafimaad loogu qaaday.
Maxamed Cumar Geeddi ayaa shacabka iyo guud ahaan ehelka uu ka tegay uga tacsiyeeyay geerida Marxuumka, waxaana uu Alle uga baryay in uu ka waraabiyo Janadii fardowso.
