Wasiirka socdaalka, jinsiyadaha iyo arrimaha qaxootiga dowladda Canada Honourable John McCallum oo ay wehliyaan Wasiirka Seyniska Honourable Dr Kristy Duncan, Xildhibaan Axmed Xuseen iyo Xildhibaan Borys Wrzesnewskyj oo labaduba ka tirsan baarlamaanka federaalka Canada ayaa maanta la kulmay Soomaalida ku nool gobolka Ontario ee dalka Canada.
Ujeedka kulanka ayaa ahaa sidii dadka Soomaalida, gaar ahaan kuwa dhibaatootinka ka heysta arrimaha sharciga ay baahiyadooda ugu gudbin lahaayeen madaxda.
Related posts
Qaar ka tirsan dadkii ka qeyb galay ayaa Wasiirka socdaalka, jinsiyadaha iyo arrimaha qoyska John MacCallum u sheegay in ay Canada joogaan waqti badan walina aanan la siin sharciga joogitaanka dalka.
Honourable John MacCallum, wasiirka socdaalka iyo jinsiyadaha ayaa sheegay in xisbigiisa Liberal-ka uu ku talo jiro sidii loo fududeyn lahaa arrimaha dacwadda qoysaska iyo qaadashada sharciga.
Wuxuu xusay in aysan suura gal aheyn in sharciyo uu adkeeyay 9- kii sano ee la soo dhaafay xisbigii Conservative-ka ee iyaga ka horreeyay ay ku baddelaan 9 bil oo ay dowladdiisu jirto, balse ay qorsheynayaan inay wax badan baddelaan.
Xildhibaan Axmed Xuseen, oo ka tirsan baarlamaanka federaalka Canada ayaa sheegay inuu mar walba u taagan yahay sidii Soomaalida ay u heli lahaayeen xaqa ay ku leeyihiin dalka Canada, islamarkaana uu diyaar u yahay sidii uu wax ugu qaban lahaa baahiyada jira isagoo la kaashanaya dowladda.
Xildhibaan Axmed Xuseen ayaa suura galiyay kadib markii uu noqday xubin ka tirsan baarlamaanka federaalka Canada in Soomaalida oo dalkan deggen ku dhawaad 30 sano ay soo hor fariistaan wasiirro heer federaal ah, si ay u weydiiyaan wax ka qabashada baahiyadooda.
Barkulan
