Shirkada nadiifinta deegaanka ee ECCO oo dhawaan laga hir geliyaya magaalada Muqdisho isla markaana uu xariga ka jaray Madaxweynaha Jamhuuriyadda Federaalka Soomaaliya ayaa waxa ay wadaa qorshe ay ku nadiifineyso Guud ahaan Gobolka Banaadir, waxaana maamulka shirkadan uu sheegay in qorshohooda uu yahay in bilicda Caasimadda ay soo celiyaan, iyagoo isticmaalaya gaadiid iyo qalab loogu tala galay qaadista qashinka.
C/xakiin Yuusuf Xasan oo ah Maareeyaha Guud ee shirkada nadiifinta deegaanka ee ECCO oo la hadlay Warbaahinta Qaranka ayaa sheegay in ka shirkad ahaan ay ka go’antahay in ay ka shaqeeyaan nadaafadda gobolka banaadir, isla markaana ay soo celiyaan bilicda caasimada.
Maareeyaha guud ee shirkada ayaa sidoo kale sheegay in nadaafadda Muqdisho uu waajib ka saaranyahay qof walba oo Soomaali ah, sidaas daraadeedna iyagoo gudanaya waajibaadka muwaadinimo ee saaran ay go’aansadeen in ay ka shaqeeyaan horumarinta nadaafadda magaaladda Muqdisho.
Shirkadan oo ay aas-aaseen muwadiniin Soomaaliyeed oo go’aansaday ka shaqeynta horumarinta nadaafadda caasimada Muqdisho ayaa waxa ay ka shaqeyn doontaa degmooyinka gobolka banaadir, iyadoo marka laga reebo bilic soo celinta Caasimada, sidoo kale shaqa abuur u sameysay dhallinyaro Soomaaliyeed oo isugu jira xirfadlayaal iyo kuwo kasoo baxay Jaamacadaha dalka.
