Hay’adda Dowladda Norway u qaabilsan dhanka gar gaarka beni’aadanimo ayaa walaac xoogan ka muujisay xaaladda beni’aadanimo sii xumaaneysa ee ka jirta magaalada Gaalkacyo ee xarunta Gobolka Mudug, taasi oo sababtay colaadda ka taagan magaalada.
Agaasimaha hay’adda NRC ee qeybta Soomaaliya Cabdiqadir Axmed ayaa sheegay in kumanaan dad ah ay isaga barakaceen colaadda magaalada Gaalkacyo, kuwaasi oo ah dad 60% si xoog ah ay u saameysay colaada iyo abaaraha ka jirta deegaanno ka tirsan gobolka Mudug.
Warbixinta ay soo saartay hay’adda ayaa lagu sheegay in sanadkii 2015-ka ay magaalada Gaalkacyo ka barakaceen 90,000 oo qof, kuwaasi oo ku noolaa 13 ka mid ah xeryaha dadka soo barakacay ee koonfurta , halka ay iminka sii barakaceen 20,000 qof, saddexdii todobad ee la soo dhaafay kadib dagaalo u dhexeeya ciidamo kala taabacsan maamulada Puntland iyo Galmudug, kuwaasi oo 80% dadka baracay ay yihiin carruur, haween iyo dad da’ ah.
Hay’adda Dowladda Norway u qaabilsan dhanka gar gaarka beni’aadanimo ayaa ka deyrineyso xaaladaha ay ku noolyihiin qoysaski ka qaxay magaalada, kuwaasi oo aan iminka heysan wax gurmad ah, waxaana ay hay’addu sheegtay in roobabka deyrta ay ka curteen qeybo ka mid ah gobolka Mudug ay saameyn ku yeelan karto qoysaska Barakacayaasha ah, taasi oo laga cabsi qabo inay ka dhalato fatahaado iyo cudurada faafa sida kalooraha iyo shuban biyoodka, iyadoo hada ay jirto xaalado nafa dari ah oo soo food saartay carruurta iyo dadka da’da ah.
Hay’adda NRC oo tan iyo 2007 ka howlgasha magaalada Gaalkacyo ayaa sheegtay in ku dhawaad 5,000 oo qof ay gaarsiiyeen gurmad deg deg ah, inkasta oo ay hay’addu xustay in kaalmadasi aysan ahayn mid dabooli karta baahiyaha heysta qoysaska magaalada ka baracakay.
Hay’addu waxa ay ugu baaqday dhinacyada isku haya magaalada Gaalkacyo in waxkasta ay ku dhameeyaan wada hadal, isla markaana ay dhibaatada ka dulqaadaan shacabka lagu qasbay inay guryahooda ka barakacaan
