Magaalada Garoowe ee xarunta Dowlad goboleedka Puntland ayaa ka bilaabatay doorashada aqalka hoose, iyadoo Cali Yuusuf Cali Xoosh uu noqday Xildhibaankii ugu horeeyey ee loo doorto Aqalka hoose Barlamaanka Federalka ah.
Cali Yusuf ayaa cod aqlabiyad ah kaga guulaystay Cabdirashiid Xasan Nadiif oo ah musharixii kale ee la tartamayay, waxana uu helay 49 cod, halka Cabdirashiid Xasan uu isna helay 1 cod, maadaama sida sharciga uu qabo ay mudane kasta soo dooranayaan 50 ergo.
Wariyaha Warbaahinta Qaranka Yuusuf Maxamed Maxamuud ayaa ku soo waramaya in amniga magaalada si aad ah loo adkeeyay, waxaana maanta la dooranayaa 12 mudane, waxaana kuraasta dhanka Puntland uga qeyb galaya Baarlamaanka Federaalka ay yihiin 37 kursi, kuwaasi oo inta dhiman la dooran doono maalmaha soo socda.
Guddiga Federaalka ee hirgelinta doorashooyinka dadban iyo kuwa heer goboleed ee Puntland ayaa ku sugan hoolka ay doorashada ka dhaceyso, waxaana doorashada ay ku saabsantahay tan aqalka hoose oo la dooran doono 12 mudane, halka inta dhiman ay maalmaha soo socda ka dhici doonto Garoowe.
