Urur goboleedka IGAD ayaa taageero xooggan u muujiyay qabsoomidda doorashada Madaxtinimada Soomaaliya ee lagu wado inay dhacdo dabayaaqada sanadkan aynu ku jirno.
Madaxda Urur Goboleedka IGAD oo kulankooda 29aad ku yeeshay magaalada Addis Ababa ee xarunta dalka Ethiopia ayaa sheegay inay taageersanyihiin hanaanka doorashada dadban ee dalka, isla markaana ay soo dhaweynayaan dadaallada ku aadan sidii loogu guuleysan lahaa qabsoomidda doorashada Madaxtinimada ee Soomaaliya oo lagu wado inay dhacdo dhamaadka bisha December ee sanadkan.
Ra’isul Wasaaraha Ethiopia Hailemariam Desalegn ayaa hoosta ka xariiqay in doorashada Madaxtinimada ee Soomaaliya la qaban doono xilliga loo qorsheeyay ee ah inta aysan dhamaan sanadkan 2016-ka
Mr Hailemariam Desalegn waxa uu sidoo kale tilmaamay in weerarada ay weli wadaan maleeshiyada Al-Shabab ay ugu wacanahay gaabis ka yimid xagga ciidamada Nabad ilaalinta Midowag Afrika ee AMISOM oo uu ku sheegay in ay ugu wacantahay taageeradii ay heli jireen oo aan gaarsiisneyn heerkii loogu talagalay.
Shirka Madaxda urur goboleedka IGAD ee diirada lagu saaray arrimaha Soomaaliya iyo Koonfurta Sudan ayaa waxaa ka qeyb galay Madaxweyneyaasha Soomaaliya, Mudane Xasan Sheekh Maxamuud, Jabuti Ismaaciil Cumar Geelle, Koonfurta Sudan Silva Kir, Wadanka Sudan Cumar Xasan Al-bashiir iyo xubno kale oo ka socday sideedda dowladood e ay ku mideysanyihiin IGAD, waxaa kaloo ka qeb galay wakiilo ka socday Qaramada Midoobay iyo xubno la casuumay.
