7 Qof oo ka shaqeeya arrimaha samafalka oo ay afduubteen maleeshiyada Shabaab ayaa gaaray magaalada Baydhabo, kadib markii ay ka qaateen lacago madax furasho ah.
Dadka la haystay oo u shaqeynayay hay’ad samafal oo lagu magacaabo Gareedo ayay maleeshiyaadka Al-Shabaab ka afduubteen deegaanka Deeynuunaay oo ay u tageen howlo shaqo kaddib markii dadka deegaanka ay ka cawdeen biyo la’aan.
Shaqaalahaasi oo muddo todobaad ah ay gacanta ugu jireen koxda Shabaab aya isugu jiray 3 dumar ah, iyo 4 rag ah oo uu kujiray darawalkii waday gaarigii ay la socdeen, waxayna u shaqeynayeen hay’adda Gareedo oo ka shaqeysa arrimaha samafalka deegaanadaasi.
Dadaalo badan oo ay u galeen ehelada dadka ay afduubteen Al-Shabaab ayaa ku guuleystay in la sii daayo, maadaama ay ka qaateen lacago madax furasho ah, waxaana ay gacanta ku hayeen muddo todobo cisho ah.
Maleeshiyaadka Al-Shabaab ayaa caado ka dhigtay inay qafaashaan dadka u dhaq dhaqaaqa bulshada, iyagoo qaarkood dil u geysta halka kuwa kalena ay ka qaataan lacago madax furasho ah.
Todobada qof oo bad qaba ayaa shalay dib ugu laabtay magaalada Baydhabo ee xarunta Gobolka Baay sida uu inoo xaqiijiyay Wariyaha Warbaahinta Qaranka ee Gobolka Baay Siraaji Sheekh Isxaaq.
