Shirkan oo bishii mar ay isga xog waraystaan dowladda Federaalka, Dowlad goboleedyada iyo Beesha Caalamka horumarada iyo caqabadaha dadaallada adeegyada muhiim ka u ah nolosha lagu gaarsiinayo deegannada laga xureeyay maleeshiyada Al-Shabaab, waxa ka qeyb galay Wasiiro dowladaha Wasaaradda Arrimaha Gudaha, Federaalka iyo Dib u heshiisiinta Soomaaliya, Lataliyaha Madaxweynaha ee dhanka Amniga, Wasiiro ka socday Maamul Goboleedyada, Madaxda Hey’adaha ka shaqeeya xasilinta iyo beesha Caalamka
Shirkan waxaa si gaar ah diiradda loogu saaray ahmiyadda Amnigu u leeyahay xasilinta sida uu sheegay Wasiiro Dowlaha Wasaarada Arrimaha Gudah Mudane Cabdullaahi Faarax Wehliye.
“Waxyaabaha aan ka hadalnay maanta waxa ka mid ahaa in Hey’adaha Amniga ay warbixin naga siiyeen halka ay waxmarayaan qaabka ay u qorsheeyeen in dowladdu AMISOM ugala wareegto Amniga, anagana waxaan ka wada hadalnay sida xasilintu uga qeyb qaadan karto Amniga macnaheedu waxa weeye xasilintu waxa ay ka shaqeysay dhamaan deegaanada laga xureeyay Al-Shabaab sidii adeegii bulshada loogu soo celin lahaa amnigana waa u muhiim” Wasiiro Dowlaha Arrimaha Gudaha ayaa sidaasi yiri
Wasiirka Arrimaha Gudaha ee Galmudug Maxamed Xayir Nuur oo ka mid ahaa Wasiirada ka socday dowlad goboleedyada ayaa tilmaamay in shirkan uu muhiim yahay xalka caqabadaha horyaala xasilinta.
Dowladda Federaalka oo kaashanaysa dowlad goboleedyada dallka ayaa dadaal ku bixinaysa sidii adeegyada aas aasiga ah ay u heli lahaayeen dadka ku nool deeganada laga xureeyay Al-Shabaab.
Cabdishakur Cali Axmed
