Taliyaha Ururka 26-aad Guutada Saddexaad ee Taliska Qeybta 60-aad ee Ciidamada Xoogga dalka Soomaaliyeed Gaashaanle sare Xasan Jaamici oo la hadlay Radio Muqdisgo codka Ciidamada Qalabka sida, ayaa ka warbixiyay dagaal Maleeshiyada ay Al-Shabaab ku qaadeen deegaano ka tirsan Gobolka Shabeellaha hoose.
Goobaha ay Maleeshiyada Al-Shabaab weerareen waxaa ka mid ah deegaanada Buula-mareer,Golweyn Qoryooley iyo Xero Ciidamada AMISOM degan yihiin oo ku taalo Gobolkaasi.
Gaashaanle sare Xasan Jaamici ayaa sheegay in Al-Shabaab labo ka mid ah Xeryaha Ciidamada AMISOM iyo kuwa Xoogga dalka ay ku sugan yihiin ku soo qaadeen weerar Qaraxyo ah ka dibna laga hortagay.
“ Labo meelood oo ka mid ah meelaha hadda aan kuu sheegay sida deegaanada Buula-mareer Xeryaha ku yaala ee AMISOM iyo SNA ku sugan yihiin ayaa waxay ku soo qaadeen Qaraxyo iyo Arbushaad weerar isugu jira,markii ay Qaraxyada dhaceen weeraradana wey ku xigeen,afaafka hore ee Difaacyada ayay Ciidamada Xoogga dalka iyo AMISOM ku sugaanyeen markii weerarka la soo qaadayay,” Ayuu yiri Gaashaanle sare Xasan Jaamici.
Sidoo kale,Taliyaha Taliyaha Ururka 26-aad Guutada Saddexaad ee Taliska Qeybta 60-aad ee Ciidamada Xoogga dalka Soomaaliyeed Gaashaanle sare Xasan Jaamici oo hadalkiisa sii wata ayaa intaasi raaciyay in Qaraxyada Shabaab ay soo qaadeen ay ka koobaanyeen labo gaari oo walxaha Qarxa laga soo buuxiyay,waxayna ciidamada uga hortageen meel xoogaa u jirta Xeryaha Ciidamada laguna qarxiyay,sidoo kalena lagu baabi’iyay Maleeshiyadii la socotay.
Weerarada Al-Shabaab ku qaadeen deegaanada Buula-mareer Golweyn iyo Qoryooley ma jiraan wax khasaaro ah oo ka soo gaaray Ciidamada Xoogga dalka Soomaaliyeed iyo AMISOM,marka laga reebo Maleeshiyada Al-Shabaab ee weerarka soo qaaday oo meydadkooda lagu arkay geedaha hoostooda oo Ciidamada Qalabka sida ay goobta ugu tageen,sida uu xaqiijiyay Taliye Xasan Jaamici.
Deegaanka Buula-mareer oo ka tirsan degmada Kurtunwarey ee Gobolka Shabeellaha hoose ayaa guud ahaan waxaa gacanta ku haya Ciidamada Xoogga dalka,kuwaasi oo habeen iyo maalin u soo jeeda sidii Shacabka Cadow Al-Shabaab uga difaaci lahaayeen.
