Tartan cilmiyeedka bisha Ramadaan oo galay sanadkii todobaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankii ugu horeeyay oo ah wareegga koowaad ku tartamay tartameyaasha Degmooyinka Waaberi VS Xamar Jajab oo ka wada tirsan Gobolka Benaadir, waxaana barnaamijka sanadkii shanaad oo xiriir ah taabagelineya Maamulka Gobolka Benaadir.
Tartameyaasha labada degmo ee Waaberi VS Xamar Jajab ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon.
Waaberi
Tartameyaasha Degmada Waaberi ee gobolka Benaadir waxaa la weydiiyey todobo Su’aal, waxa ay ka jawaabeen Labo su’aal, waxaana ay iska qaldeen shan su’aal, waxa ay ka faa’iideysteen Hal su’aal oo soo hareer martay tartamayaasha Xamar Jajab, sidaa darteed wadarta guud ee dhibcaha tartameyaasha Degmada Waaberi ay heleen waxay noqotay lix (6) dhibcood.
Xamar Jajab
Tartamayaasha Degmada Xamar Jajab ee gobolka Benaadir waxaa dhankooda la weydiiyay todobo su’aal, waxa ay ka jawaabeen Hal su’aal, iyagoo iska qalday lix su’aal, waxa ay ka faa’iideysteen Labo su’aal oo soo hareermartay tartamayaasha Degmada Waaberi, sidaasi darteed wadarta guud ee dhibcaha ay heleen tartameyaasha Degmada Xamar Jajab waxay noqotay lix (6) dhibcood.
Sida sharciga qabo, marka ay tartamaayasha isku mari waayaan xagga dhibcaha oo ay noqdaan bar baro, guddiga waxa uu ku daraa tartanka su’aalo dheeri ah oo la doonayo in lagu kala saaro cidda u soo gudbaysa wareegga labaad ee tartanka.
Hadaba min hal su’aal oo lagu daray tartamayaasha Degmada Waaberi waxa ay isak qaldeen su’aashii la weydiiyay, halka tartamayaa degmada Xamar Jajab ay heleeleen su’aashii dhankooda ahayd. Taasi oo ka dhigan in Waaberi ay la timid 6-dhibcood oo qura, Halka tartamayaasha Xamar Jajab ay heleen 8 dhibcood.
Tartamayaasha Degmada Xamar Jajab ee Gobolka Benaadir ayaa caawa u soo gudbay wareegga labaad ee tartanka
Habeen dambe haddii uu Alle idmo oo ah habeenka labaad ee tartanka, waxaa ku tartamaya, tartamaayasha degmooyinka Dhahar oo ka tirsan Gobolka Sanaag iyo,Hodan oo ka tirsan Gobolka Banaadir.
Sawir Qaade: Qadar Cali Nuur
