Magaalada Muqdisho waxaa 14-kii bishan October ka dhacay qaraxii ugu weynaa ee magaalada ka dhaca, kaasi oo ay ku dhinteen dad ka badan 500 oo qof, islamarkaana boqolaal kale ay ku dhaawacmeen, haddaba Dadkii wax ku noqday ayaa waxaa ka mid ahaa…
1- Duraan Abdi Xersi, waxa uu ahaa Sagaal iyo toban sano jir Arday ahaa, 2016 ayuu dhammeeyey waxbarashada heerka Dugisiga sare, isagoo ka baxay Dugisga Macmuur ee Magaaladda Muqdisho, waxa uu dhiganayey Jaamacadda Ummadda Soomaaliyeed, Semister-ka koowaad ayuuna ahaa, waxa uu kamid ahaa Alle ha u naxariistee dadkii ku dhintay Xasuuqii ka dhacay Igooyska Zoobe ee Magaaladda Muqdisho 14kii Oktoobar 2016.
Fowziyo Cali Xasan oo la dhalatay Duraan, ayaa ii sheegtay nolosha qoyska in saameyn weyn ay ku yeelatay geerida walaalkeed ku timid, iyaddoo xustay in uu ahaa qofka kaliya ee wax u bartay qoyska, islamarkaana la joogay waqtigii laga faa’iideysan lahaa noloshiisa iyo Cilmigii uu soo bartay.
2- Hooyo Shariifo Xuseen Raage, waxay aheyd garab rarato jirta 40 sano, iibinta caano ay dhabar keeda kusoo qaado ayey ku maareyn jirtay Nolosha Qoyskeeda oo ka koobnaa 6 qof oo Afar kamid ah ayey yihiin caruur aad u yar iyo Aabaha Qoyskaasi oo la jiifay xanuun uu muddo la daalaa dhacayey, Alle ha u naxariistee waxay ku dhimatay qaraxii 14ka Oktoobar ka dhacay Muqdisho.
Mid kamid ah Ehelka Qoyskaaga oo Wakaaladda Wararka Qaranka Soomaaliyeed ee SONNA la hadlay ayaa inoo sheegay in Geerida Alle ha u naxariistee Hooyo Shariifo Qoykaasi saameyn xooggan ay ku yeelatay, maadaama ay aheyd qofka kaliya ee nolosha reerka uu ku tiirsanaa, una shaqeyn jirtay.
3- Maxamed Cabdulle Cabdi, waxa uu ahaa Curadka Qoys ka kooban 8 Qof oo 6 kamid ah ay gabdho yihiin, da’diisu waxay aheyd 35 sano jir, waxuuna ka shaqeynayey Dukaan ku yaalla Suuqa bakaaraha, waxa uu ahaa qofka kaliya ee uu ku tirsanaa qoyskaasi, isagoo waxbarashada ka bixin jiray caruurta ka yar, dadkii sida arxan darradda aheyd loogu laayey Isgooyska Ex Zoobe ayuu kamid ahaa, xilliga uu dhimaney ayaa waxa uu ka yimid aaska mid kamid ah Ehelkiisa oo geeriyooday, laguna aasay Deegaanka Tareedisho ee duleedka Muqdisho.
Nafiso Cabdulle Cabdi, waa currad ku xiggeenka Qoyska Maxamed, mar aan aan la hadalnay, waxay inoo sheegtay in saameyn weyn qoyska ay ku reebtay geerida Marxuum Maxamed Cabdulle, iyadda iyo walaalaha ka yar ayey sheegtay inay joojiyeen Waxbarashada, maadaama ay waayeen qofka ka bixiya Lacagta waxbarashada oo markii uu noolaa uu ka bixin jiray Alle ha u naxariistee Marxuum Maxamed Cabdulle Cabdi.
4-Cabdullaahi Ciise Yuusuf, waxuu ahaa 21 sano jir deganaa Degmadda Kaxda ee Gobolka Banaadir, waxa uu ahaa Xoogsato ka shaqeyn jiray agagaarka Isgooyska Zoobe ee Magaaladda Muqdisho, isagoo kamid noqday dadkii Nabad diidka Alshabaab ay ku laayeen Xasuuqii 14ka Oktoobar. sawirka lama hayo.
5-Xuseen Axmed Guuleed, waxuu ahaa 32 sano jir Xaasle ah oo ay u joogeyn Labo caruur ah, waxa uu ahaa Qofka kaliya ee u shaqeynayey Qoyskiisa oo ka kooban 10 ruux oo ay ku jiraan Hooyadiis iyo adeerkiis, oo la daala dhacaya xanuun sariirta saaray, waxa uu sidoo kale ahaa dhaqtar ka shaqeeynayey Isbitaalka Madiino, Xilli uu marayey isgooyska Zoobe, kana soo baxay Shaqadiisa islamarkaana kusii jeeday hoygiisa ayuu ku dhintay Xasuuq 14ka Okoobar ka dhacay.
Cabdullaahi Cali Faarax oo Marxuum Xuseen ay ilmo adeer yihiin ayaa inala wadaagay saameynta Qoyskaasi uu ku reebay geedi Alle ha u naxariistee Xuseen Axmed Guuleed, isagoo sheegay in dadka aad uu u saameyey ay kamid yihiin hooyadiis iyo adeerkiis oo xaaladooda uu si gaar ah uu ula socday, hadana ay sariir la saaran yihiin xanuuno kala duwan.
SONNA NEWS
