Wasiiro ka tirsan Xukuumadda Federaalka Soomaaliya ayaa maanta gaaray magaalada Baraawe ee caasimadda Maamulka Koonfur Galbeed Soomaaliya, si ay ugu kuur galan xaaladda ka jirta magaaladaasi.
Wasiirada tegay magaalada Baraawe ayaa waxaa ka mid ah Wasiirka Gaadiidka iyo Duulista Hawada Xukuumadda Federaalka Soomaaliya Mudane Maxamed Cabdulahi Salaad (Omaar) iyo Wasiirka Gargaarka, Mareynta Masiibooyinka Soomaaliya Xamsa Saciid Xamsa iyo Wasiiru dowlaha Wasaaradda Waxbarashada, Hiddaha iyo Tacliinta sare Cabdiraxmaan Maxamuud Cabdulle (Jaabur),.
Wafdigan ayaa kormeeray qeybo ka mid tahay magaalada Baraawe sida goob laga dhisayo iskuul lagu baran doono farsamada gacanta, garoonka diyaaradaha Baraawe iyo xero barakacayaal oo ku taalla magaalada Baraawe.
Kormeerka kadib Wasiiradan ka socday Xukuumadda Federaalka ayaa kulamo la qaatay Maamulka iyo qeybaha kala duwan ee bulshada, iyagoo ka dhageystay warbixin ku saabsan baahiyaha ka jirta Degmada.
Wasiiru dowlaha Wasaaradda Waxbarashada, Hiddaha iyo Tacliinta Sare ee Soomaaliya Mudane Cabdiraxmaan Maxamuud Cabdulle ayaa ballan qaaday inay wax ka qaban doonaan baahiyaha dhanka Waxbarashada ee ka jirta Degmada Baraawe ee Gobolka Shabeellaha Hoose.
“Maanta waxaan kormeer ku tegay magaalada Baraawe ee caasimadda Maamulka Koonfur Galbeed, si aan ugu kuur galo baahida dhanka Waxbarasho ee ka jirta Baraawe, baahiyaha aan ku aragnay Baraawe waxaan u gudbin doona madaxda dalka sida Madaxweyne Maxamed Cabdullaahi Farmaajo iyo Ra’iisul Wasaare Xasan Cali Kheyre, waxaana rajeynaya in anaga oo kaashaneyna Wasaaradda Waxbarashada Koonfur Galbeed, door muhiim ah aan ka wada qaadan doono horumarinta Waxbarashada”ayuu yiri Wasiiru dowlaha Wasaaradda Waxbarashada Soomaaliya.
Wasiirka Gargaarka Soomaaliya Mudane Xamsa Saciid Xamsa ayaa sheegay in Dowladda Federaalka ay wax ka qaban doonto baahiyaha dhanka nolosha ee heysta dadka barakacayaasha ee ku nool magaalada Baraawe.
Wasiirka Gaadiidka iyo Duulista Hawada Soomaaliya Mudane Maxamed Cabdulahi Salaad (Omaar) ayaa ballan qaaday in la dhameystiri doono dhismaha garoonka diyaaradaha Degmada Baraawe oo xiligan uu ka socdo dhisme.
