Wasaaradda Beeraha Soomaliya oo kaashaneysa FAO iyo Midowga Yurub ayaa maanta daah furtay mashruuc lagu horumarinayo Beeraha iyo Waraabka Dalka.
Ka doodida iyo soo bandhigidda macluumaadkii laga soo uruuriyey mashruuca koowaad ee horumarinta beeraha iyo waraabka oo laga fuliyey Dowlad Goboleedyada kala ah Hirshabeelle, Jubbaland iyo Koonfur Galbeed iyo qorshe u dejinta qaabkii loo fulin lahaa mashruuc labaad oo xambaarsan horumarinta dalagyada beeraha iyo dayactirka kaabayaasha beeraha ee Shabeelaha Hoose iyo Shabeelaha Dhexe ayuu ku saabsanaa shirkan oo ay ka qeyb galeyn mas’uuliyiin ka tirsan Wasaaradda Beeraha ee Xukuumadda Federaalka iyo kuwa maamul goboleedyada, Wakiilka hay’adda FAO ee Soomaaliya, madax ka socotay Midowga Yurub iyo qubaro ku xeel dheer dhanka Beeraha.
Kulanka oo ay soo qaban qaabisay Wasaaradda Beeraha Soomaaliya oo kaashaneysa FAO ayaa intii uu socday waxaa sidoo kale lagu soo bandhigay qaabka ugu haboon ee loo kobcin karo wax soo saarka dalka, loogana hortegi karo abaaraha, waxaana mashruucan maalgelinaya Midowga Yurub iyo hay’adda SIDA oo fadhigeedu yahay dalka Sweden.
Xaamud Cali Xasan Wasiir ku xigeenka Wasaarada Beeraha iyo Waraabka Soomaaliya oo gaba-gabada kulanka kaddib Warbaahinta la hadlay ayaa sheegay In mashruucan uu ka koobnaan doono saddex qeybood oo kala ah Horumarinta dalagyada Beeraha, dayactirka kanaalada biyaha ee Shabeelaha Hoose iyo Shabeelaha Dhexe iyo kobcinta wax soo saarka dalka si loo gaaro isku filnaansho dhameystiran.
Ugu dambeyn Wasiir ku xigeenka Wasaaradda Beeraha iyo Waraabka Soomaaliya Xaamud Cali Xasan iyo wakiilka FAO ee Soomaaliya Serge Tissot ayaa kala saxiixday heshiis quseeya mashruuca horumarineed ee laga fulin doono dowlad Goboleedyada kala ah Hirshabeelle, Jubbaland iyo Koonfur Galbeed.
