Dood wadaagan oo ay soo qaban qaabiyeen Ruggta Qorayaasha Soomaaliyeed ee dalka Uganda ayaa waxaa uu halku dhigiisa ahaa fagaaro ka hadal ku dhisan aqoon iyo cilmi, waxaana ka qeyb galay dood wadaaga Aqoonyahanada wax ka barata Jaamacadaha dalkan Uganda, diblomaasiinta Safaaradda Soomaaliya ee Uganda iyo marti sharaf kale .
Kulankan oo inta badan loogu doodayay (Soomaaliyada aan doonayno in aan noqono) ayaa waxaa aqoonyahada ka doodayeen shan qodod oo asal u ah Soomaalida sida la rabo in ay noqoto mustaqbalka oo kala ah, dhaqaale aqoon ku dhisan, Aminga oo salka loo dhigo, Dowlad Wanaagga iyo Adeega Bulshada.
Yuusuf Xasan Abgaalow oo mid ah qaban qaabiyaasha dood wadaagan oo Radio Muqdisho ugu warbixinayay u jeeda kulankan ayaa sheegay in Rugta qoraasha Soomaaliyeed ay doonayaan in ay cilmi baaris ka sameeyaan sida ay noqon karto (Soomaaliyada aan rabno) oo ay kulamadan fagaara ka hadalka ah ay ka qayb galinayaan dhamaan dhinacyada bulshada sida dhallinyarada, odayaasha dhaqanka, aqoonyahanka, haweenka iyo cid walba oo qayb ka ah bulshada dhinacyadeeda kala duwan.
Dhanka kale Qunsulka Safaaradda Soomaaliya ee dalka Uganda Cali Khadar Wardheere oo madasha ka hadlay ayaa qaban qaabiyasha kulanka ku booriyay inay intaan ka balaariyaan doodaha nuucan oo kale ah, isla markaana la qoraa wixii halkan kasoo baxa si dadka kale u gaarto fariinta dooda kasoo baxday.
Ardayda iyo aqoonyahanka Soomaaliyeed ee ku nool Kampala ayaa inta badan qabta doodaha looga hadlayo arrimaha xalka dalkeena Soomaaliya, iyadoo inta badan lasoo bandhigo warmurtiyeedka kasoo baxa shirka.
Fiidow Maxamuud Fiidow
Kampala Uganda
