Iyadoo magaalada Dhuusamareeb ee xarunta Galmudug ay ka socto qabanqaabada doorashada madaxweynaha dowlad goboleedka Galmudug iyo ku xigeenkiisa ayaa si weyn loo adkeeyay ammaanka guud ee magaalada.
Wariyaha warbaahinta Qaranka uga soo warama Dhuusamareeb Maxamed Deeq Cabdi Maxamed ayaa sheegay in ciidamadu ay si taxadar leh u sugayaan ammaanka magaalada, maaddaama lagu jiro diyaargarowgii ugu dameeyay ee doorashada madaxtinimada Galmudug oo lagu wado in ay berri ka dhacdo caasimadda Galmudug ee Dhuusamareeb.
Dhismaha dowlad goboleedka Galmudug oo muddo dheer loo fadhiyay Dhuusamareeb, islamarkaana ay madaxda dowladda Federaalka ku bixiyeen dadaal dheeraad ah ayaa hadda u muuqata mid soo dhameystirmeysa, haddii berri oo axad ah la doorto madaxweynaha iyo ku xigeenkiisa.
