Maamulka Degmada Gaalkacyo ee Galmudug ayaa maanta ku wareejiyay ciidamada booliska Gaalkacyo Saldhig ciidan boolis oo dhawaan laga hirgaliyay magaalada iyo gaari loogu tala galay in ay ku shaqeeyaan ciidanka xasilinta booliska Gobalka mudug
Madasha wareejinta saldhiga iyo gaariga oo ay goob joog ka ahaayeen Taliye ku-xigeenka qeybta guud ee ciidanka booliska Galmudug Gaashaanle Sare Maxamed Nuur Cali iyo mas’uuliyiinta maamulka Degmada Gaalkacyo ee Galmudug ayaa waxaa ugu horeyn ka hadlay Duqa Degmada Gaalkacyo Xirsi Yuusuf Barre oo ka warbixiyay dadaalka loo galay hirgalinta xarunta boolis iyo gaariga loogu tala galay in lagu adeego, Isagoo ku wareejiyay saraakiishii ciidanka booliska degmada Gaalkacyo
Taliye ku-xigeenka ciidanka booliska Galmudug Gaashaanle Sare Maxamed Nuur Cali ayaa uga mahadceliyay maamulka Degmada Gaalkacyo garab istaaga ciidanka booliska, isagoo sidoo kala sheegay in xarunta iyo gaariga maanta lagu wareejiyay ay wax weyn kusoo kordhinayaan arimaha sugidda amniga iyo u adeegidda bulshada ee ay hayaan ciidanka booliska Gobalka Mudug.
