Maxamed Cabdi Xasan, oo ka tirsan maleeshiyaadka argagaxisada ah ee Alshabaab ayaa isku soo dhiibay maamulka degmada Qansaxdheere ee gobolka Baay, sida ay xaqiijiyeen saraakiisha.
Maamulka iyo saraakiisha ciidanka ee degmada ayaa soo dhoweeyay ninkan ka tirsanaa Alshabaab, waxaa uu la soo baxsaday hubkii uu ku howlgali jirey intii uu kamid ahaa kooxda nabad diidka ah ee Alshabaab.
Maxamed waxaa uu ka howlgali jirey degaanada hoostaga degmada Qansaxdheere, waxaana oo hadda go’aansaday in uu ka haro isla markaana ka faa’ideysto cafiska madaxweynaha Jamhuuriyadda Soomaaliya u fidiyay maleeshiyaadka ka tirsan kooxaha argagaxisada ah.
Muddooyinkan dambe, waxaa isa soo tarayay maleeshiyaadka Alshabaab ee ku soo biireya dowladooda, arrintaas ayaa khubarada dhanka amniga waxaa ay ku faaleeyeen in ay sababtu tahay markii howlgalada ka dhanka ah kooxahaaas ciidanku kordhiyeen isla markaana cadaadiska uu ku batay.
