Hay’adda Qaramada Midoobay u qaabilsan cunada iyo beeraha ee FAO ayaa sheegtay in uu soconayo dadaal xoog leh oo lagula dagaalamayo ayaxa, kaas oo ka jira maamul goboleedyada Puntland,Hirshabeelle iyo Galmudug.
FAO waxay tilmaamtay in wasaaradda beeraha ee dowladda federaalka Soomaaliya ay kaalin weyn ka qaadaneyso sidii ayaxa loo cirib tiri lahaa.
Shaqaalaha ayaa ku howlan in aanu ayaxu gaarin dhulka beeraha ee koonfurta dalka.
FAO waxay sheegtay in bishii Oktoobar ayaxa laga buufiyay dhul gaaraya 12,000 oo hektar deegaannada Puntland iyo Galmudug.
Ayaxan oo FAO ay ku tilmaamtay afar malyuun ayaa ka yimid dhanka dalka Yemen, waxaana uu ka soo bilaabay Soomaaliya gobollada Bari ee Puntland .
Ayaxa ayaa hadda u jiheystay gobollada bartamaha iyo koonfurta dalka taas oo halis galin karta dhulka beeraha.
