Munaasabad kooban oo min hal darajo lagu dalacsiinayay askari kasta oo ka mid ah kooxda fanaaniinta ciidanka Booliska ee Heegan, laguna qabtay dugsiga Tababarka ciidanka booliska ee Jeneraal Kaahiye ayaa waxaa ka qeybgalay Wasiiro ka tirsan Xukuumadda Federaalka Soomaaliya, Xildhibaanno, Taliyaha Ciidanka Booliska Soomaaliyeed, ururada bulshada rayidka iyo marti sharaf kale oo munaasabadda lagu casuumay.
Taliyaha Ciidanka Booliska Soomaaliyeed Sareeyo Gaas Cabdi Xasan Maxamed Xijaar ayaa dul istaagay muhiimadda ciidanka booliska ee suggida Amniga iyo wadashaqeynta ka dhexeysa shacabka iyo Booliska, waxaana uu hambalyo u diray kooxda fanka ciidanka booliska ee Heegan oo la dalacsiiyay min hal darajo ah.
Wasiirka Maaliyadda Xukuumadda Faderaalka Soomaaliya Dr Cabdiraxmaan Ducaale Beyle ayaa sheegay in Xukuumadda Faderaalka ay joogeyneyso xuquuqda ciidamada, isaga oo hambalyo la wadaagay askarta la dalacsiiyay ee ka tirsan kooxda Heegan.
Wasiirka Amniga Xukuumadda Federaalka Soomaaliya Mudane Xasan Xundubey Jimcaale ayaa ku ammaanay ciidanka booliska waajibaadka ay shacabka u hayaan, waxaana uu xusay ahmiyadda ay leedahay shaqada boolisku u hayo bulshada, isagoo kula dar daarmay inay si hufan u gutaan waajibaadka loo igdmaday.
Kooxda Fanka Ciidanka Booliska ee Heegan ayaa ah kooxda hab suugaan ku soo bandhigga waajibaadka ciidanka booliska iyo kaalinta ay ku leeyihiin xaqiijinta Nabadgelyada.
