Itoobiya ayaa gashaanka u daruurtay eedeyn kaga timid Mareykanka oo aheyd in markale ay ishortaagtay gargaar bani’aadanimo oo loogu talagalay dadka tabaaleysan ee ay colaaddu ku saameysay gobolka Tigray.
Hay’adda horumarinta Mareykanka ayaa Dowladda Itoobiya ku eedeysay inay sabab u tahay gargaar la’aanta ka jirta gobolka Tigray.
Waxay ka digtay in cunnada gargaarka ay ka go’i doonto gobolkaasi dhammaadka Todobaadka soo socda.
Boqolaal kun oo qof ayaa halis ugu jira macaluul, xilli uu dagaal qaraar dhex marayo ciidamada dowladda iyo kuwa TPLF.
Haseyeeshee dowladda Itoobiya ayaa beenisay in si ulakac ah loo hor istaagay gargaarka bani’aadannimo ee loogu talagalay dadka ku tabaaleysan gobolkaasi.
Afhayeenka Ra’iisal wasaare Abiy Axmed ayaa saxaafadda u sheegtay in dowladdiisu ay mar kastaa Gawaarida sida gargaarka u ogolaaneysay inay galaan gobolkaasi Tigray balse duruufaha iyo dagaalada socda awgeed uu gargaarkaas gaari waayay meelihii loogu talo galay.
