Iyadoo sadexda bisha December ku beegan tahay maalinta caalamiga ah ee dadka naafada ayaa wasaaradda Haweenka Galmudug waxay magaalada Gaalkacyo ku qabatay kulan lagu dhiirigelinayo dadka naafada gaar ahaan iskuulka wax lagu baro dadka maqalka naafada ka ah.
Dr. Yurub Cabdulqaadir Cali, oo ah isu duwanaha wasaaradda Haweenka gobolka Mudug, ayaa tilmaantay in ay muhiimad gaar ah siinayaan dadka naafada ah gaar ahaan ardayda maqalka naafada ah sidii ay u heli lahaayeen waxbarasho wanaagsan.
Iskuulka dhagooliyaasha ee magaalada Gaalkacyo waxaa dhigtay boqolaal arday maqalka naafo ka ah kuwaas oo u baahan garab istaag, guddoomiyaha ururka naafada Gaalkacyo Cabdiraxmaan Yaasiin Colaad ayaa wasaaradda ugu mahadceliyay garashadooda ku aadan in ay yimaadaan iskuulka.
Sanad kasta sadexda december waxaa dunida oo dhan looga dabaal degaa xuska maalinta caalamiga ah dadka naafada ah, Soomaaliya ayaana kamid ah meelaha laga xusay maalintaas caalamiga ah.
