Saalooyinkan oo lagu fulin doono qaliimada ay u baahanyihiin bukaanada soo booqda Isbitaalka Hooyada iyo Dhallaanka ee Banaadir, isla markaana shaqeyn doonta afar iyo labaatanka saac ayaa waxaa dib u habeyn iyo qalabeynba ku sameysay safaaradda Shiinaha ee Soomaaliya, waxaana munaasabad kooban oo lagu daahfurayey ka qeyb galay Wasiirka Caafimaadka Soomaaliya, Safiirka Shiinaha u fadhiya Soomaaliya, Maamulka Isbitaal Banaadir, dhakhaatiirta iyo qeybaha kala duwan ee shaqaalaha Isbitaalka.
Agaasimaha Isbitaal Banaadir Marwo Fartuun Shariif Maxamed ayaa sheegtay in dayactirka Saaladan ay qeyb weyn ka qaadan doonto howlaha baaxada leh oo ay bukaanada u hayaan.
Safiirka Shiinaha u fadhiya Soomaaliya Ambassador Fei Shengchao (Feey Shenshaaw) ayaa sheegay inay sii wadi doonaan taageeridda Isbitaal Banaadir oo la xusuusto inay dhiseyn sanadkii 1977.
Wasiirka Caafimaadka iyo Daryeelka Bulshada Soomaaliya Dr Fowziya Abiikar Nuur ayaa Madaxda safaarada China ee Soomaaliya uga mahadcelisay dib u habeynta Saalada Qaliinka ee Isbitaal Banaadir, waxayna dhinaca kela ku baaqday in ilgaara lagu hayo Isbitaal Banaadir oo shaqo hufan u haya Dadka bulshada ugu nugul.
Isbitaal Banaadir oo ay Dowladda dib u howlgalisay 6 February 2019 ayaa si maalinle ah u qaabila in kabadan laba boqol oo bukaan oo isugu jira Hooyo iyo dhallan, kuwaas oo si bilaasha loo dabiibo.
