Wasiirka Warfaafinta Dhaqanka iyo Dalxiiska XFS Senator Cusmaan Abokor Dubbe oo ku sugan magaalada Addis Ababa ee dalka Itoobiya ayaa maanta kulan dheer xafiiskiisa kula qaatay Wasiirka Warfaafinta Dowladda Federalka Ethiopia Dr. Legesse Tulu.
Wasiir Dubbe ayaa sheegay in wasiirka warfaafinta Itoobiya ay ka wada-hadleen iskaashiga labada dal ee dhinacyada Warbaahinta iyo khibrad wadaagga Warfaafinta.
“Wasiirku wuxu qiray in Soomaalidu xilligan aad ugu horreeyaan Warbaahinta Cusub ee Social Media ha, halka Ethiopia ay ku xooggan tahay Warbaahintii soo jireenka ahayd ee Mainstream Media ha loo yaqaan,” ayuu yiri Wasiir Cusmaan Dubbe.
Sidoo kale labada wasiir waxay ka wada hadleen dhibaatada iyo fitnada ay wararka been abuurka ah ee ‘Fakenews’ ku hayaan amniga iyo dowladnimada iyo sidii wadajir looga hortegi lahaa.
“Waxanu isla garanay muhiimadda ay Gobolka Geeska ugu fadhido iskaashiga labada wadan ee Somalia iyo Ethiopia, gaar ahaan dhinacyada Amniga, dhaqaalaha iyo Warbaahinta. Heshiisyo arimahaas ku saabsan in mustaqbalka dhow la wada galo ayaanu ku heshiinay Wasiir Legesse Tulu,” ayuu qoraalkiisa ku sii daray wasiir Cusmaan Dubbe.
Kulankaan waxaa Wasiirka Warfaafinta JFS ku weheliyey Safiirka dalkeenna u dhafiya Ethiopia Ambassador Gen. Cabdullahi Axmed Jaamac Ilka-Jiir iyo Xoghayaha koowaad ee Safaaraddda Cabdullahi Cabdirisaaq.
