Taliska booliska Galmudug ayaa caawa soo saaray liiska 36 qof oo lagu raad joogo, kuwaas oo loo heysto hurinta dagaalkii kooxda Ahlu-Sunna ay Dhuusamareeb ku soo qaaday Jimcihii lasoo dhaafay.
Dadka la doon-doonayo waxaa ku jira Sheekh Shaakir Cali Xasan iyo saraakiil kale.
Madaxda howlgallada booliska Soomaaliya ee ka howlgala Galmudug Dhamme Nuur Cilmi Maxamed oo warbaahinta u akhriyey bayaankii kasoo baxay Taliska booliska ayaa soo bandhigay sawiirada dadka la doon-doonayo.
Dadkaan lasoo bandhigay ee lagu raad joogo ayuu sheegay Taliye Nuur Cilmi inay ku dhuumaaleysanayaan deegaano ka tirsan Galmudug, isagoo bulshada reer Galmudug ka codsaday in dadka ku jira liiskaan ay booliska lasoo socod-siiyaan, si sharciga loo hor keeno.
Sidoo kale dowlad goboleedyada deriska la ah Galmudug iyo dowladda federaalka ayaa bayaankaan looga codsaday inay ku garab siiyaan maamulka Galmudug, sidii gacanta loogu soo dhigi lahaa xubnahaan.
Saraakiisha ku jirta liiska dadkaan ay Galmudug doon-dooneyso waxaa ka mid ah Sheekh Shaakir Cali Xasan, guddoomiyihii hore ee Dhuusamareeb Cabdullaahi Beentaa, sarkaal sare oo lagu magacaabo Jeneraal Hanbacoor, G/Sare Cabdullahi Raage oo ka tirsanaa jiray ciidanka NISA iyo saraakiil kale.
Hoos ka eeg sawirrada ragga loo aqoonsaday Wanted-ka
