Kulan loogu mahadcelinaayay laguna gudoon siinaayey shahaado sharaf madaxda shirkada Somprint, ayaa lagu qabtay Wasaaradda Warfaafinta Soomaaliya oo ay ka soo qaybgaleen wasiirka Warfaafinta, Agaasimaha guud ee Wasaaradda, Agaasimaha waaxda Wargaysyada iyo Agaasime waaxeedyada Wasaaradda.
Wasiirka Warfaafinta, ayaa guddoonsiiyey shahaado sharaf madaxda shirkadda Somprint, waxa uuna ku amaanay doorka weyn ay ka qaateen Wargeyska Dalka iyo dal dhiska dalka .
Sidoo kale Wasiirka Warfaafinta, ayaa sheegay in Wargeyska Dalka uu yahay kan ugu weyn ee dalka ka soo baxa goob kastana laga heli karo sida diyaarada, xafiisyada, garoomada iyo goobo badan oo dalka ah, fariinta uu xambarsan yahayna wargeyska dalka ay tahay mid ka duwan fariimaha ku qoran baraha bulshada ama fariimaha codka ee markaa baxada.
Shirkadda Somprit ayaa muddo lix sano ah waxa ay si dhow ula shaqeyneysay Wasaaradda Warfaafinta Dhaqanka iyo dalxiiska gaar ahaan waaxda Wargeyska Dalka oo ay kala shaqeyneysay daabacadda Wargeyska Dalka oo maalinta Isniinta soo baxa.
Ugu danbeyn Wasiirka Wasaaradda Warfaafinta mudane Cusmaan Abokor Dubbe ayaa oga mahad celiyey madaxda shirkadda Somprint sida hagar la’aanta ah ay ula shaqeysay Wasaaradda Warfaafinta sidoo kalena ay qeyb weyn uga qaadatay dib u dhiska dalka.
