Wasiirka Warfaafinta, Dhaqanka iyo Dalxiiska Xukuumadda Fedaraalka Soomaaliya, mudane Daa’uud Aweis Jaamac, oo uu wehliyo madaxa Hawlgalka ATMIS, Danjire Maxamed El-Amine Souef, ayaa ka hadlay guulaha dowladdu ka gaartay dagaalka ka dhanka ah Khawaarijta iyo gaarsiinta adeegyada bulshada deegaanadii laga xoreeyay khawaarijta.
Wasiirka Warfaafinta ayaa sheegay in ay kordhayaan tirada khawaarijta ee isa soo dhiibaya soona ajiibaya baaqii dowladda ee ahaa in naftooda ay badbaadsadaan.
Dowlad goboleedada Hirshabeelle, Galmudug iyo koofur galbeed ayuu sheegay Wasiirku inay iska soo dhiibeen xubno badan oo ka mid ahaa khawaarijta, kuwaas oo la marinayo hannaanka dhaqanka celinta si ay bulshada ula qabsadaan.
Wasiirka warfaafinta XFS ayaa sidoo kale sheegay in guul ballaaran laga gaaray dagaalladii xagga fekerka qaldan ee khawaarijta iyo xagga dhaqaalaha lagana xiray Akoonno badan oo ay ganacsatada ku baadi jireen.
Daa’uud Aweys Jaamac, Wasiirka Warfaafinta, Dhaqanka iyo Dalxiiska XFS ayaa xusay shirkii ay dhowaan Muqdisho ku yeesheen madaxda Waddamada safka hore ee uu hoggaaminayay madaxweynaha JFS, mudane, Xasan Sheekh Maxamuud, kaas oo qodobbadii kasoo baxay ay ka mid ahaayeen sidii laysaga kaashan lahaa ururrada argagixisada ah.
Wuxuu sidoo kale sheegay Wasiirku in Waddamada safka hore ay ka wada shaqeeyaan sidii Soomaaliya looga qaadi lahaa cunaqabataynta hubka, taas oo u sahlaysa in si fudud loo ciribtiro kooxaha Khawaarijta.
