Wasiirka Wasaaradda Caafimaadka iyo daryeelka bulshada Xukuumadda Federaalka Soomaaliya Dr Cali Xaaji Aadan ayaa maanta mid ka mid ah Gawaaridii Hey’adda WHO ugu deeqday Wasaaradda Caafimaadka ku wareejiyey Maamulka Gobolka Banaadir.
Gaarigan oo noociisu yahay Hardtopka ayaa loogu talagalay in lagu fududeeyo howlaha Caafimaadka Gobolka banaadir gaar ahaan qeybta tallaalka oo howl aad u wayn ay ugu socoto bulsho waynta Soomaaliyeed ee ku nool Banaadir iyo deegaannada ku dhow dhow.
Guddoomiye ku-xigeenka arrimaha bulshada iyo wacyi gellinta Gobolka Banaadir Mudane Cabdicasiis Cismaan Maxamed ayaa ka mahadceliyey gaariga lagu wareejiyey maanta waxa uuna xusay in gaarigan wax badan ka tari doono adeegga bulshada ay u hayaan qeybta Caafimaadka Gobolka Banaadir.
Dhanka kale Wasiirka Wasaaradda Caafimaadka iyo daryeelka Bulshada Xukuumadda Federaalka Soomaaliya Dr Cali Xaaji Aadan waxa uu daahfuray barnaamijka Solar-ka ee loogu talagalay Xarumaha Caafimaadka ee loogu adeego bulshada kiisii ugu horeeyey ee laga hirgelliyey Xarubta Caafimaadka degmada Xamarwayne oo ah xarun thaariikhi ah bulshadana loogu adeegayey muddo fog.
Hey’adda Ururka Caafimaadka Adduunka ee WHO ayaa ka hergelliyay barnaamijka Solar System-ka ee lagu qalabaynayo Xarumaha Caafimaadka dad waynaha Xarunta Caafimaadka degmada Xamarwayne ee Gobolka Banaadir, taasoo la filayo in wax badan ay ka badeli doonto qarashaadkii faraha badnaa ee ku bixi jiray Korantada.
