Munaasabadda waxaa ka soo qeybgaley Wasiirka Wasaaradda Caafimaadka iyo daryeelka bulshada xukuumadda Federaalka Soomaaliya H.E Dr Ali Haji Aden, Wasiirka Wasaaradda Shaqada iyo arrimaha bulshada Xukuumadda Federaalka Soomaaliya Dr Maxamed Cilmi, Wasiiru dowlaha Wasaaradda Caafimaadka iyo daryeelka bulshada XFS Dr Maryama Maxamed Xuseen, Xildhibaano ka tirsan labada Aqal ee Baarlamaanka Federaalka Soomaaliya agaasimayaal, Dhaqaatiir iyo xubno sare oo ka kala socday xafiisyada Dowladda iyo kuwa aan dowliga aheyn ee ka shaqeeya Arrimaha Caafimaadka.
Xuska Maalinta Cagaarshowga Adduunka waxaa lagu muujiyaa muhiimadda beerku u leeyahay nolol caafimaad qabta, iyo baahida loo qabo in sare loo qaado ka-hortagga fayraska Cagaarshowga helitaanka baaritaan iyo daawaynta si kor loogu qaado caafimaadka Beerka, loogana hortago cudurrada beerka ku dhaca iyo in la gaaro yoolka ciribtirka Cagaarshoowga 2030.
Hal-ku-dhegga sanayaaaan ayaa ahaa “Hal Nolol Beer” (one live, liver).
Barnaamijka Qaran ee xakamaynta Cagaarshowga Soomaaliya waxaa lagu soo bandhigey macmuulaad muhiim ah oo ku saabsan farriimo wacyi ah, baaqyo iyo guubaabo la xiriira xogaha heerka xanuunada Cagaarshowga ee dalka guud ahaan iy arrimo kale oo muhiim ah.
Xafiiska Xakamaynta Cagaarshowga ee Wasaaradda caafimaadka iyo daryeelka bulshada Xukuumadda Federaalka Soomaaliya, ayaa markii ugu horreysay si wadajir ah u marti gelliyey maalinta caalamiga ah ee cagaarshowga adduunka.
Wasaaradda Caafimaadka iyo daryeelka bulshada Xukuumadda Federaalka Soomaaliya ayaa ololahaan la kaashatey bahwadaagteeda xarumaha bixiya adeegyada Caafimaadka bulshada. Sidoo kale, Ujeeddada madasha ayaa ah, sare u qaadista heerka wacyiga bulshada ee cudurkaan dilaaga ah.
Xafiiska Xakamaynta Cagaarshowga ee Wasaaradda caafimaadka iyo daryeelka bulshada Xukuumaadda Federaalka Soomaaliya waxa uu u mahadcelinayaa dhammaan Madaxda, Siyaasiinta, Dhaqaatiirta, Shaqaalaha Caafimaadka Ururka Dhaqaatiirta iyo kasoo qeybgalayaashii soo ajiibay munaasabadda xuska maalinta Caalamiga ah ee Cagaarshowga.
