Wasaaradda Isgaarsiinta Iyo Teknoolojiyadda Xukuumadda Federaalka Soomaaliya ayaa Muqdisho maanta ku qabatay kulan wadatashi ah oo ku saabsan siyaasadda adeegsiga Tiknoolojiyadda casriga ah (Digital Inclusion).
Kulankaan oo lagu gorfeeyay siyaasadda adeegsiga tiknoolojiyadda casriga ah (Digital Inclusion), oo ay soo agaasintay Wasaaradda Isgaarsiinta iyo Tiknoolijiyada dowladda Federaalka Soomaaliya ayaa waxaa ka qeyb-galay Xubno ka socday Hay’adaha dowladda, Ururrada bulshada rayidka, shirkadaha ka shaqeeyo Arrimaha Isgaarinta, bahda Waxbarshada iyo dadka nugal ee baahiyaha gaarka ah qaba.
Khubarada soo diyaariyay siyaasadda adeegsiga Tiknoolojiyadda casriga oo ka taageeray Wasaaradda ee kala ah Asal solutions iyo KCL ayaa soo bandhigay ahmiyadda dalkeennu u leedahay Adeegga Tiknoolojiyad Casri ah oo loo dhan-yahay, waxay dul istaageen habraacyada loo jiheynayo in guud ahaan waddanka laga hirgeliyo adeeggan muhiimka ah, Iyada oo mudnaan gaar ah la siinayo bulshada qeybaheeda kala duwan, Sida; dadka reer guuraga ah, dadka baahiyaha gaarka ah qabo, haweenka, dhallinyrada aan gaarin da’da qaangaarnimada iyo caqadaha hortaagan hannankii xal loogu heli lahaa.
Agaasimaha Guud ee Wasaaradda Mudane Cabdicasiis Duwane Isaaq oo furay shirka ayaa sheegay in looga fadhiyo xubnaha ka qeyb-galay in dood adag ka yeeshan isticmaalka Adeega Teknoolojiyadda casriga ah iyo in ay noqoto mid sare oo xowli ah isla markaana caqadabaha iyo xalalka xooga la saaro inta madasha ay socoto.
“Siyaasaddan waxay horsed fiican u noqon doontaa sidii waddanka oo dhan iyo dadkeena oo dhan ay qayb uga noqon lahaayeen isbedelka teknoolojiyaddu oo noloshooda door weyn kaga jirto” Ayuu sheegay Mudane Cabdiasiis.
Ugu dambeyn, ka qeyb-galayaasha ayaa ku biirayay Siyaasadda talooyin iyo aragtiyo dhaxal gal u ah hore-u-socdka siyaasadda adeegsiga tiknoolojiyadda casriga ah.
