Safiirka Shiinaha u fadhiya Soomaaliya, Fei Shengchao ayaa wareysi gaar ah siiyay Wakaaladda Wararka Qaranka Soomaaliyeed ee SONNA, isaga oo ka hadlay xiriirka taariikhiga ah ee labada dal, go’aanka Golaha Ammaanka ee qaadista cunaqabateynta hubka, iyo taageerada Shiinaha ee hindisayaasha looga golleeyahay soo celinta nabadda, xasilloonida gobolka.
Safiirka ayaa ugu horreyn ka hadlay xiriirka soo jireenka ah ee ka dhaxeeya Shiinaha iyo Soomaaliya, kaasoo soo taxnaa muddo kun sano ah.
Tan iyo markii ay Dowladda Soomaaliya ay xornimadu qaateen 1960-kii, labada dal waxay sameeyeen xiriir diblomaasiyadeed oo bilow u ahaa iskaashi u dhaxeeya labada dhinac oo ku aadan dadaallada horumarineed.
“Intii lagu guda jiray waxa loogu yeero “30-kii sano ee dahabiga ahaa” Shiinuhu wuxuu gacan ka geystay dhismaha 89-mashruuc oo waaweyn oo uu Soomaaliya ka hirgeliyay, oo ay ka mid yihiin Tiyaatarka Qaranka, Garoomada Ciyaaraha, Isbitaalka Banaadir iyo Waddada Laamiga ah ee isku xirta Koonfurta iyo Waqooyiga dalka.” ayuu yiri Danjiraha.
Safiirka ayaa intaa ku daray: “Shiinuhu wuxuu sii waday inuu garab istaago Soomaaliya, isagoo ka taageeraya wax ka qabashada musiibooyinka dabiiciga ah, baahiyaha bini’aadantinimo, amniga, iyo horumarka guud.”
Danjiraha ayaa sidoo kale ugu hambaliyeeyay dowladda iyo shacabka Soomaaliyeed go’aankii Golaha Ammaanka ee Qaramada Midoobay ee cunaqabteynta hubka looga saaray dalka, isagoo ku tilmaamay guul muhiim ah.
Danjire Fei Shengchao ayaa qiray dadaalka ballaaran ee ay DF u gashay sidii loo gaari lahaa guushan, wuxuuna hoosta ka xariiqay muhiimadda guushan ay u leedahay wadajirka Afrika.
Safiirka ayaa ku celceliyay in Shiinuhu uu si hagar la’aan ah u garab taagan yahay dadaallada lagu raadinayo nabadda, xasilloonida, iyo horumarka qaaradda, wuxuuna gaba gabadi u ballan qaaday dowladda Soomaaliya taageero buuxda.
