Dowladdda Soomaaliya iyo Hay’adaha Caalamiga ah oo ka shiray sidii loo mideyn lahaa dadaalada loogu gurmanayo qaxootiga iyo Barakacayaasha Gobalka oo lagu qabtay dalka Kenya.
Shirka oo ay soo qaban qaabisay Hay’adda Qaxootiga Adduunka ayna ka qeybgaleen Wafdi ka socday dowladda oo ay hogaaminaysay Gudoomiyaha Hay’adda Qaxootiga iyo Barakacayaasha Qaranka Marwo Safiyo Xasan Maxamed oo ay qeyb ka ahaayeen wakiilo matalayay shirkadaha ganacsiga ee sida gaarka loo leeyahay, Jaamacadaha dalka, mas’uuliyiin ka socday qaar ka mid ah Wasaaradaha dowladda, Urur Gobolleedka IGAD, Bulshada Bariga Afrika iyo hay’ado caalami ah, kuwa heer gobol ee daneeya arrimaha qaxootiga iyo barakacayaasha, waxaana looga hadlayay horumarinta jawiga maalgashiga iyo xoojinta dhaqaalaha qaxootiga, barakacayaasha, iyo bulshooyinka martida loo yahay.
Shirkan ayaa inta uu socday waxaa la isku raacay sidii loo yareeyn lahaa shaqo la’aanta iyo duruufaha ay wajahayaan qaxootiga, gaar ahaan kuwa ku soo guryo noqonaya dalkooda ee ka soo laabanaya xeryaha qaxootiga iyo barakacayaasha.
Qaar ka mid ah dadkii madasha ka hadlay ayaa tilmaamay in shirka xoogga lagu saaray sidii shaqo abuur loogu sameyn lahaa barakacayaasha iyo qaxootiga.
Gudoomiyaha Hay’adda Qaxootiga iyo Barakacayaasha Qaranka Marwo Safiyo Xasan Maxamed oo Warbaahinta la hadashay ayaa xustay in shirka ay ka soo baxeen guulo la taaban karo oo ay ugu horeyso in fursado shaqo iyo Maalgashi loo sameeyo qaxootiga dalkooda ku soo laabanaya iyo Barakacayaasha.
