Wasiiru dowlaha Wasaaradda arimaha gudaha Fedaraalka iyo dib u heshiisiinta Dowlad Gobaleedka Galmudug Cumar Maxamed Diiriye oo ay wehliyeen Masuuliyiin ka tirsan Xubnaha Golaha Wasiirada iyo Baarlamaanka Dowlad gobaleedyada Puntland iyo Galmudug iyo Saraakiisha hay’addaha Amniga Labada dowlad gobaleed ayaa maanta kormeer ku aadan la socodka dadaalada la xariira ka shaqeeynta Nabadda iyo xal u helidda colaado ka jiray deegaanada galbeedka gobalka Mudug ayaa maanta gaaray deegaanada ay dhibtu ka dhaceen.
Masuuliyiintan ayaa la filayaa in si wadajir ah ay kulamo gaar gaar ah ula qaataan bulshada ay colaadu ka dhax oogan tahay isla markaana kala hadli doonaan inta ay ku guda jiraan safarkooda nabad raadineed in ay qaataan nabadda ayna kala shaqeeyaan sidii xal waara looga gaari lahaa Colaada sidoo kalana wada xaajood looga yeelanayo dhibaatadii ka dhacday dhawaan deegaanada galbeedka gobalka Mudug
Kulanka Nabad raadineed ayaa imaanaya kadib markii dhawaan dagaal beeleed ka dhacay inta u dhaxeeysa deegaanka Saaxa Qurun iyo Dagmada Galdogob oo ay ku nafwaayeen 40 ruux ayna ku dhawacmeen in ka badan 60 qof
Wasiiru dowlaha Wasaaradda arimaha gudaha Fedaraalka iyo dib u heshiisiinta Dowlad Gobaleedka Galmudug Cumar Maxamed Diiriye ayaa mar ay warbaahinta Qaranku wax ka weydiisay kulanka maanta iyo waxa looga wada hadlayo waxa uu sheegay in Sadax qodob uu ku saleeysan yahay kulanka.
Qodabka kowaad oo ah in si sharuud la’aan ah loo joojiyo Dagaalka
In la kala qaado Ciidamo beeleed uu sheegay in ay halkaasi isku horfadhiyaan
iyo in cid walba ay isku xilqaamaan waxgaradkooda iyo maamulkoodu in inta laga wada xaajoonayo dhibaatadii dhacday aysan markale wax dagaal iyo dirir ah halkaasi ka dhicin.
