Guddiga Wacyigelinta iyo Warfaafinta ee todobaadka xoriyadda ayaa waxa uu kormeerkooda la xiriiray u kuurgelidda hanaanka ay u socdaan diyaar garowga loogu jiro maalmaha xoriyadda ee 26-ka June iyo 1-da Luulyo , gaar ahaan fanaaniinta Kooxaha kala duwan ee Qaranka oo ugu horeyso kooxaha baambeyda iyo fanaaniinta loogu talagalay inay xuska todobaadka xoriyadda ku soo bandhigaan suugaan.
Guddiga Wacyigelinta iyo Warfaafinta ayaa kormeerkooda ka bilaabay Xeebta Liido oo ay ku suganaayeen fanaaniinta kooxda Heegan iyo Daambeyda musikada ee heegan oo ka wada tirsan ciidanka booliska Soomaaliyeed, halkaasi oo ay ku soo bandhigeen gaadda cayaar oo ay si weyn ugu riyaaqeen dadweynihii u soo daawasho tegay.
Intaa kadib waxa ay guddiga tageen barxadda Kawaanka Malaayga ee degmada Xamarweyne oo ay ku diyaar garoobayeen baanda muusikada ciidanka Asluubta, halkaasi oo ay ka socotay diyaar garow aad u xoogan, waxaana ay uga sii gudbeen Barxadda Warwaas oo ay suugaan ku soo bandhigayeen fanaaniinta Banaadir Band.
Goobaha la booqday waxaa ku suganaa dadweyne aad u fara badan oo ka kala yimid degmooyinka gobolka Banaadir, kuuwaasi oo dhankooda kooxaha fanaaniinta iyo baanda muusikada kala qeybgalayay diyaar garowga todobaadka xoriyadda.
Guddiga wacyigelinta iyo warfaafinta waxa ay socdaalkooda ku gaareen beerta Nabadda oo ay ku diyaar garoobayeen Fanaaninta Horseed ee ciidanka xoogga dalka, kuwaasi oo madasha ku soo bandhigay suugaan ka turjumeysa xoriyadda iyo la dagaallanka kooxaha khawaarijta.
Ugu dambey Guddiga ayaa kormeer ku tegay xarunta degmada Xamarjajab oo ay ku sugnaayeen fanaaniinta Kooxda Onkod ee ciidanka Asluubta, halkaasi oo dadweynihii ka soo qeygaleen ay lulayeen calanka
Agaasimaha guud ee Wasaaradda Warfaafinta, dhaqanka iyo Dalxiiska ee Xukuumadda Federaalka Soomaaliya, mudane Cabdullaahi Xayir Ducaale, isla markaana hogaaminayay kormeerka guddiga Wacyigelinta iyo Warfaafinta, oo ay qeyb ka ahaayeen qaar ka mid ah Agaasime Waaxeedyada Wasaaradda ayaa sheegay in socdaalkooda uu daarnaa u kuurgelidda hannaanka ay u socdaan u diyaar garowga xuska todobaadka xoriyadda.
